දඹුල්ලේදී අද (15) පැවැති තුන්කොන් ක්රිකට් තරගාවලියේ තීරණාත්මක තරගයකින් ඉන්දියා ‘ඒ’ කණ්ඩායම පරාජයට පත්වීමත් සමඟ, 15 හැවිරිදි සුපිරි ඉන්දීය යොවුන් ක්රීඩක වෛභව් සූරියවංශි (Vaibhav Sooryavanshi) සහ ශ්රී ලංකා ‘ඒ’ කණ්ඩායමේ ක්රීඩකයන් අතර උණුසුම් වචන හුවමාරුවක් සහ තල්ලු කරගැනීමක් සිදුව තිබේ.
සුපිරි පන්දුවාරය (Super Over) දක්වා ඇදී ගිය මෙම තරගයේදී ජයග්රහණය සඳහා ලකුණු 17ක් අවශ්ය වූ අතර, ශ්රී ලංකා ‘ඒ’ පිලේ වේගපන්දු යවන ක්රීඩක කගුදාස් මතුලන් හමුවේ ඉන්දීය පිලට රැස්කරගත හැකි වූයේ ලකුණු 9ක් පමණි. එහිදී අවසන් පන්දු තුනට මුහුණ දුන් සූරියවංශිට ලබාගත හැකි වූයේ එක් හතරේ පහරක් ඇතුළුව ලකුණු 6ක් පමණි.
තරගය අවසන් වීමත් සමඟ ශ්රී ලංකා ක්රීඩකයන් ජයග්රහණය සමරද්දී, සූරියවංශි සහ සූර්යන්ශ් ෂෙඩ්ජ් ක්රීඩාගාරය දෙසට යන අතරතුර ශ්රී ලංකා ක්රීඩකයන් දෙදෙනෙකු සිදුකළ ප්රකාශයකින් කෝපයට පත් සූරියවංශි, පන්දු යැවූ මතුලන් දෙසට වේගයෙන් කඩා වැදී ඇත. එහිදී ඇතිවූ බහින්බස්වීම දුරදිග යාමත් සමඟ සූරියවංශි විසින් ශ්රී ලංකා පිලේ ක්රීඩකයෙකුව තල්ලු කර දමන ආකාරය වීඩියෝ දර්ශනවල ද සටහන්ව තිබේ. තත්ත්වය පාලනය කිරීම සඳහා ශ්රී ලංකා ජ්යෙෂ්ඨ ක්රීඩක නිරෝෂන් දික්වැල්ල වහා මැදිහත් වී ක්රීඩකයන්ව දෙපසට කිරීමට පියවර ගත්තේය.
මීට පෙර, තරගය අවසන් වූ අවස්ථාවේදී සුපිරි පන්දුවාරයක් පැවැත්වීමට නීතිමය ප්රතිපාදන නොමැති බව පවසමින් ඉන්දීය නායක තිලක් වර්මා විනිසුරුවන් සමඟ විනාඩි 10ක් පමණ උණුසුම් සාකච්ඡාවක නිරත වූ අතර, එහිදී ද සූරියවංශි විනිසුරුවන් සමඟ වාද කිරීමට පැමිණියත් ඉන්දීය ප්රධාන පුහුණුකරු ඔහුව මැඩපවත්වා ඇත. මෙම විනය විරෝධී හැසිරීම් සම්බන්ධයෙන් ක්රීඩකයන්ට නිල දඬුවම් පනවන්නේද යන්න පිළිබඳව මෙතෙක් ප්රකාශයට පත් කර නොමැත.
