ඉන්දීය ක්රිකට් කණ්ඩායමේ අයර්ලන්ත තරග සංචාරයේ පළමු විස්සයි20 තරගය අද (26) පස්වරු 6:00ට බෙල්ෆාස්ට්හිදී ආරම්භ වීමට නියමිත අතර, මෙම තරගය ලෝක ක්රිකට් ප්රජාවගේම අවධානයට ලක්ව ඇත්තේ ඉන්දීය යොවුන් පිතිකරු වයිබව් සූර්යවංශිගේ ජාත්යන්තර මංගල ආගමනය පිළිබඳ දැඩි අපේක්ෂාවක් පවතින බැවිනි. වයස අවුරුදු 15ක් සහ දින 91ක් වන සූර්යවංශි අද තරගයට එක් වුවහොත්, ඔහු පිරිමි විස්සයි20 ජාත්යන්තර තරගයකදී ICC පූර්ණ සාමාජික රටක් වෙනුවෙන් ක්රීඩා කළ ළාබාලතම ක්රීඩකයා ලෙස වාර්තා පොත් අතරට එක්වනු ඇත.
මෙම වාර්තාව මීට පෙර අයර්ලන්තයේ ජොෂ් ලිට්ල් සතු වූ අතර, ඔහු සිය මංගල විස්සයි20 තරගයට ක්රීඩා කරන විට වයස අවුරුදු 16යි දින 309ක් විය. එසේම, සූර්යවංශි අද ක්රීඩා කළහොත්, ඔහු ඉන්දියාව වෙනුවෙන් ජාත්යන්තර තරගයකට ක්රීඩා කළ ළාබාලතම ක්රීඩකයා බවට පත්වෙමින්, සචින් තෙන්ඩුල්කාර් 1989 දී තැබූ වාර්තාවද අභිබවා යනු ඇත. සචින් තෙන්ඩුල්කාර් සිය මංගල ටෙස්ට් තරගයට එක්වන විට වයස අවුරුදු 16යි දින 205ක් ලෙස වාර්තා විය.
සමස්ත පිරිමි ජාත්යන්තර ක්රිකට් ඉතිහාසයේ ළාබාලතම ක්රීඩකයා ලෙස පාකිස්තානයේ හසන් රාසා වාර්තාගත වුවද, 2020 වසරේදී ජාත්යන්තර ක්රිකට් කවුන්සිලය (ICC) විසින් ජාත්යන්තර තරග සඳහා සහභාගී විය හැකි අවම වයස අවුරුදු 15ක් ලෙස නියම කර තිබීම සුවිශේෂී කරුණකි. ක්රිකට් ලොව නව පෙරළියක් කිරීමට සැරසෙන මෙම තරුණ පිතිකරුවා අද සිය මංගල ජාත්යන්තර තරගය ක්රීඩා කරමින් ඉතිහාසය අලුතින් ලියනු ඇති දැයි ක්රිකට් ලෝලීන් මහත් කුතුහලයෙන් පසුවෙති.
