ශ්රී ලාංකික ජනතාවගේ ජෛවමිතික දත්ත (Biometric Data) එනම් ඇඟිලි සලකුණු සහ ඇස්වල තොරතුරු ඉන්දියානු සමාගමකට ලබාදීමේ සූදානමක් පවතින බවට අන්තර් විශ්වවිද්යාල ශිෂ්ය බලමණ්ඩලයේ හිටපු කැඳවුම්කරු වසන්ත මුදලිගේ මහතා බරපතළ චෝදනාවක් එල්ල කරයි. අද (30) මාධ්ය වෙත අදහස් දක්වමින් ඔහු කියා සිටියේ ජාතික හැඳුනුම්පත් පද්ධතියට අදාළ තීරණ ගැනීමේ බලය ඉන්දියාවට පවරා ඇති බවයි.
2012 වසරේ සිට ක්රියාත්මක වන ඉලෙක්ට්රොනික හැඳුනුම්පත් ව්යාපෘතිය සඳහා මේ වන විට රුපියල් බිලියන 5.6කට අධික මුදලක් වැය කර මෘදුකාංග සංවර්ධනය කර ඇත. තවත් රුපියල් මිලියන 600ක් වැය කිරීමෙන් දේශීයව මෙම ව්යාපෘතිය අවසන් කළ හැකිව තිබියදී, 2021 වසරේ සිට මෙයට ඉන්දියානු සම්බන්ධතාවය ඇතුළත් කිරීමට පියවර ගෙන ඇති බව ඔහු පවසයි.
2023 වසරේදී අසාදු ලේඛනගත කර තිබූ සමාගමකට මෙම කොන්ත්රාත්තුව ලබාදීමට උත්සාහ කර ඇති බවත්, 2025 ජනවාරි මාසයේදී ඉන්දියාව සමඟ ඇති කරගත් ගිවිසුමක් හරහා ටෙන්ඩර් කැඳවීමේ බලය පවා ඉන්දියාවට ලබාදී ඇති බවත් ඔහු චෝදනා කරයි. මේ වන විට එම ටෙන්ඩර් ක්රියාවලිය සඳහා ලංකාවේ අසාදු ලේඛනගත වූ සමාගමක් ඉන්දියාව හරහා නැවත ඇතුළත් වී ඇති බව ඔහු අවධාරණය කළේය.
ලංකාව යනු ඉන්දියාවේ ප්රාන්තයක් හෝ රූකඩ රාජ්යයක් නොවන බව පවසන මුදලිගේ මහතා, රටේ ජනතාවගේ දත්ත ආරක්ෂාව සහ දේශපාලන ස්වාධිපත්යය පාවා දීමට ඉඩ දිය නොහැකි බව ප්රකාශ කළේය. ලංකාවේ රාජ්ය ව්යාපෘතියක් සඳහා ටෙන්ඩර් කැඳවීමේ බලය ඉන්දියාවට පැවරුවේ කුමන පදනමකින්ද යන්න පිළිබඳව රජය වහාම පැහැදිලි කිරීමක් කළ යුතු බව ඔහු වැඩිදුරටත් ඉල්ලා සිටියේය.
