පාදුක්ක වටරැක එළිමහන් සිර කඳවුරේ පිහිටි ‘සුනීත පාසලේ’ ඉගෙනුම ලැබූ රැඳවුම් භාරයේ සිටින සිසුන් 06 දෙනෙකු මෙවර අපොස සාමාන්ය පෙළ විභාගයෙන් විශිෂ්ට ලෙස සමත්ව උසස් පෙළ හැදෑරීම සඳහා සුදුසුකම් ලබා තිබේ. රැඳවියන් වෙනුවෙන්ම වෙන්වූ ශ්රී ලංකාවේ එකම පාසල වන වටරැක “සුනීත පාසලේ” පිහිටුවා තිබූ විභාග මධ්යස්ථානය හරහා මෙම සිසුන් පිරිස විභාගයට පෙනී සිට ඇත.
මීට වසර දෙක තුනකට ඉහතදී විවිධ සුළු වැරදි සම්බන්ධයෙන් බන්ධනාගාරගත වූ මෙම දරුවන්, වටරැක බන්ධනාගාරයේ ඇති සුනීත පාසලේ අධ්යාපනය ලබමින් සිටී. මෙම පාසල 2014 වර්ෂයේදී බන්ධනාගාර දෙපාර්තමේන්තුව සහ අධ්යාපන දෙපාර්තමේන්තුව ඒකාබද්ධව ආරම්භ කරන ලදී.
වටරැක බන්ධනාගාර අධිකාරි රෝහිත සෙනරත් මහානාම මහතා මේ පිළිබඳව අදහස් දක්වමින් සඳහන් කළේ, නොයෙකුත් හේතූන් මත පාසල් අධ්යාපනය මඟහැරී අගතියට පත් දරුවන් ලංකාවේ විවිධ අධිකරණ මඟින් මෙහි එවන බවයි. විශේෂ ශ්රේණියේ රජයේ පාසලක් ලෙස ක්රියාත්මක වන සුනීත පාසල තුළ විදුහල්පතිවරයෙකු සහ ගුරු කාර්ය මණ්ඩලයක් සිටින අතර, දරුවන්ගේ අධ්යාපන මට්ටමට ගැලපෙන පරිදි කඩිනම් අධ්යාපන ක්රමවේදයක් ඔස්සේ ඔවුන් උසස් පෙළ දක්වා සුදුසුකම් ලබන මට්ටමට ගෙන ඒම මෙහි අරමුණයි.
