වසරකට වැඩි කාලයක් තාවකාලිකව නතර වී තිබූ වාහන අංක තහඩු මුද්‍රණය කිරීමේ කටයුතු ප්‍රවාහන හා මහාමාර්ග නියෝජ්‍ය අමාත්‍ය වෛද්‍ය ප්‍රසන්න ගුණසේන මහතාගේ ප්‍රධානත්වයෙන් ඊයේ (08) පෙරවරුවේ නිල වශයෙන් ආරම්භ කෙරිණි. මෙම කටයුතු වේරහැර පිහිටි මෝටර් රථ ප්‍රවාහන දෙපාර්තමේන්තුවේ මෝටර් වාහන පරීක්ෂා කිරීමේ හා පුහුණු කිරීමේ මධ්‍යස්ථානයේදී සිදු කෙරිණි.
වසර 22ක් පුරා පෞද්ගලික සමාගමකින් සිදු කරන ලද අංක තහඩු මුද්‍රණ කොන්ත්‍රාත්තුව පසුගිය වසරේ අප්‍රේල් මස අවසන් වීමත් සමඟ මෙම කටයුතු තාවකාලිකව නතර වී තිබිණි. ඒ අනුව, විධිමත් ප්‍රසම්පාදන ක්‍රියාවලියකින් පසු තෝරාගත් ‘සවුත් ඒෂියන් ටෙක්නොලොජි’ (South Asian Technology) සමාගම සහ මෝටර් රථ ප්‍රවාහන දෙපාර්තමේන්තුව එක්ව මෙම කටයුතු යළි ආරම්භ කර ඇත.
මෙම නව වැඩපිළිවෙළ යටතේ මෙතෙක් මුද්‍රණය නොකර නතර වී තිබූ අංක තහඩු ප්‍රමාණය මෙන්ම අලුතින් ලියාපදිංචි වන වාහන සඳහා ද දෛනිකව අංක තහඩු මුද්‍රණය කර කඩිනමින් ලබාදීමට පියවර ගන්නා බව නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා ප්‍රකාශ කළේය.
මෙම නව ක්‍රියාවලියේ පවතින සුවිශේෂී පහසුකම් පිළිබඳව අදහස් දක්වමින් බලධාරීන් මෙසේ සඳහන් කළහ.
“මෙම නව වැඩපිළිවෙළ යටතේ ඇති විශේෂත්වය වන්නේ අංක තහඩුවේ මුද්‍රණ කටයුතු අවසන් වී පැය දෙකක් ඇතුළත ඒ පිළිබඳ කෙටි පණිවිඩයක් (SMS) මඟින් වාහන හිමියා වෙත ස්වයංක්‍රීයව දැනුම් දීමයි. යතුරුපැදි, ත්‍රිරෝද රථ, මෝටර් රථ ඇතුළු සියලුම වාහන කාණ්ඩ සඳහා වන මෙම මුද්‍රණ කටයුතු අද සිට වඩාත් කඩිනම් කර තිබෙනවා.”
මෙම අවස්ථාවට මෝටර් රථ ප්‍රවාහන දෙපාර්තමේන්තුවේ වැඩබලන කොමසාරිස් ජනරාල් තාරක දේවප්‍රිය, කොමසාරිස් (පාලන) ප්‍රියන්තා දිසානායක, කොමසාරිස් (රියැදුරු බලපත්‍ර) තනූජා ආරියරත්න යන මහත්ම මහත්මීන් සහ ‘සවුත් ඒෂියන් ටෙක්නොලොජි’ සමාගමේ ප්‍රධාන විධායක නිලධාරි ඇතුළු නිලධාරීහු රැසක් සහභාගි වූහ.
