ශ්රී සම්බුදු තෙමගුල සිහිපත් කරමින් පැවැත්වෙන වෙසක් පුණ්ය මහෝත්සවය වෙනුවෙන් 2026 මැයි 27 වනදා සිට ජුනි 02 වනදා දක්වා කාලය ‘වෙසක් සතිය’ ලෙස ප්රකාශයට පත් කර ඇති බව රාජ්ය පරිපාලන, පළාත් සභා සහ පළාත් පාලන අමාත්යාංශය නිවේදනය කරයි. බුද්ධශාසන අමාත්යාංශය, බෞද්ධ කටයුතු දෙපාර්තමේන්තුව සහ දිස්ත්රික් ලේකම් කාර්යාල ඇතුළු රාජ්ය හා රාජ්ය නොවන ආයතන රැසක සහයෝගය ඇතිව මෙවර වෙසක් උත්සවය උත්කර්ෂවත් අයුරින් පැවැත්වීමට කටයුතු සංවිධානය කර තිබේ.
ශ්රී බුද්ධ වර්ෂ 2570 ක් වූ රාජ්ය වෙසක් මහෝත්සවය මෙවර මැයි 27 වනදා මාතර, තිහගොඩ, මිදෙල්ලවල පුරාණ විහාරස්ථානයේදී පැවැත්වීමට නියමිතය. මෙම රාජ්ය මහෝත්සවයට සමගාමීව වෙසක් සතිය තුළ දිවයිනේ සියලුම විහාරස්ථාන කේන්ද්ර කරගනිමින් අධ්යාත්මික සංවර්ධනයට මුල්තැන දෙන අර්ථවත් සහ ඵලදායී වැඩසටහන් මාලාවක් ක්රියාත්මක කිරීමට අපේක්ෂා කෙරේ.
දිවයින පුරා පිහිටි සියලුම විහාරස්ථාන, දහම් පාසල්, පාසල් මෙන්ම රාජ්ය හා රාජ්ය නොවන ආයතන ආශ්රිතව මෙම වෙසක් වැඩසටහන් ක්රියාත්මක වනු ඇත. ප්රාදේශීය සහ දිස්ත්රික් ශාසනාරක්ෂක මණ්ඩලවල පූර්ණ මාර්ගෝපදේශකත්වය යටතේ වෙසක් සතියට අදාළව යෝජිත විශේෂ ආගමික සහ සමාජයීය කාර්යයන් ඉටු කිරීමට අවශ්ය සියලුම කටයුතු සම්පාදනය කරන ලෙස අදාළ බලධාරීන් දැනුම් දී සිටී.
