රජය විසින් අලුතින් පනවන ලද 50%ක රේගු බදු අතිරේක ගාස්තුව (Surcharge) හේතුවෙන් මෙරට වාහන මිල අවම වශයෙන් රුපියල් ලක්ෂ 15කින් පමණ ඉහළ යනු ඇති බව ශ්රී ලංකා වාහන ආනයනකරුවන්ගේ සංගමය (VIASL) පවසයි. මෙම තීරණයත් සමඟ සාමාන්ය පාරිභෝගිකයාට වාහනයක් මිලදී ගැනීම තවදුරටත් සිහිනයක් වනු ඇති බව එම සංගමයේ මාධ්ය ප්රකාශක අරෝෂ රොඩ්රිගෝ මහතා මාධ්ය වෙත අදහස් දක්වමින් කියා සිටියේය.
ඔහු පෙන්වා දෙන්නේ පවතින ඉහළ රේගු බදු සහ ඇමරිකානු ඩොලරය හා ජපන් යෙන් අගය ඉහළ යාමට අමතරව මෙම නව ගාස්තුව පැනවීම ආනයනකරුවන්ට දරාගත නොහැකි මට්ටමක පවතින බවයි. වාහනයේ වර්ගය අනුව ඇතැම් වාහනවල මිල රුපියල් ලක්ෂ 15 සිට 25 දක්වා පරාසයකින් ඉහළ යා හැකි බව ඔහු වැඩිදුරටත් සඳහන් කළේය. මැයි 15 වනදාට පෙර ණයවර ලිපි (LC) විවෘත කළ පිරිසට මෙම අතිරේක ගාස්තුවෙන් නිදහස් වීමට අවස්ථාව ලැබුණද, විදේශ විනිමය අනුපාත ඉහළ යාම සහ 2.5%ක සමාජ ආරක්ෂණ දායකත්ව බදු (SSCL) ඉහළ දැමීම හේතුවෙන් සමස්ත වාහන වෙළඳපොළේ මිල ගණන් සීඝ්රයෙන් ඉහළ යාම වැළැක්විය නොහැකි බව ආනයනකරුවන් අනතුරු අඟවයි.
