වනාතවිල්ලුව, මයිලන්කුලම ප්රදේශයේදී අද (14) දහවල් සිදුවූ අවාසනාවන්ත රිය අනතුරකින් 30 හැවිරිදි දෙදරු පියෙකු ජීවිතක්ෂයට පත්ව තිබේ. කුඹුරක් සී සාා අවසන් වී නැවත ට්රැක්ටරය පදවාගෙන එමින් සිටියදී, රියදුරුට එය පාලනය කරගත නොහැකිව මාර්ගය අසල තිබූ කුඹුරු යායකට ජලය සපයන ඇළ මාර්ගයකට පෙරළී යාමෙන් මෙම මාරක අනතුර සිදුව ඇත.
මූලික පොලිස් විමර්ශනවලදී හෙළි වී ඇත්තේ අධික වේගය හේතුවෙන් රියදුරුට ට්රැක්ටරය පාලනය කරගත නොහැකි වූ බවයි. ඇළ මාර්ගයට පෙරළී ගිය ට්රැක්ටරයට එම රියදුරු යටවීම හේතුවෙන් එම ස්ථානයේදීම ඔහු මියගොස් ඇති අතර, සිද්ධිය වන අවස්ථාවේ ඔහු කොමිස් පදනම මත වෙනත් අයෙකුට අයත් ට්රැක්ටරයක් පදවාගෙන පැමිණෙමින් සිට ඇත.
වනාතවිල්ලුව පොලීසිය විසින් සිද්ධිය සම්බන්ධයෙන් වැඩිදුර විමර්ශන ආරම්භ කර තිබේ. දෛනික ජීවිකාව සඳහා වෙහෙස මහන්සි වී වැඩ කළ තරුණ පියෙකු මෙලෙස අවාසනාවන්ත ලෙස ජීවිතයෙන් සමුගැනීම මයිලන්කුලම ප්රදේශවාසීන් අතර දැඩි කම්පනයක් ඇති කිරීමට හේතු වී ඇත.
