ශ්රී ලංකාවේ ගුවන් සේවා සහ සැපයුම් (Logistics) අංශය නව මානයකට ඔසවා තබමින් ‘WEAIR’ භාණ්ඩ ප්රවාහන ගුවන් සේවය මෙරටට පැමිණීම, රටේ ගුවන් භාණ්ඩ ප්රවාහන ධාරිතාව සහ කලාපීය සම්බන්ධතාවය ශක්තිමත් කරන සැලකිය යුතු ආයෝජනයක් බව අමාත්ය විජිත හේරත් මහතා ප්රකාශ කර තිබේ. ලක්සම්බර්ග් (Luxembourg) රාජ්යයේ ආයෝජනයක් ලෙස ආරම්භ කෙරෙන මෙම සුවිශේෂී ව්යාපෘතියේ සමාරම්භක උත්සවයට එක්වෙමින් අමාත්යවරයා මේ බව පැවසීය.
ශ්රී ලංකාව කේන්ද්ර කරගනිමින් ක්රියාත්මක වන මෙම ‘WEAIR’ භාණ්ඩ ගුවන් සේවය මඟින් කොළඹ නගරය, දකුණු ආසියාව, නිරිතදිග ආසියාව, ඉන්දියානු සාගර කලාපය මෙන්ම මැදපෙරදිග සහ අප්රිකානු කලාපයේ ප්රධාන වෙළෙඳ ගමනාන්ත රැසක් සමඟ සෘජුව සම්බන්ධ කිරීමට නියමිතය. මෙම දැවැන්ත ව්යාපෘතිය ශ්රී ලංකාවේ ආර්ථික විභවය සහ උපායමාර්ගික භූගෝලීය පිහිටීම කෙරෙහි ජාත්යන්තරය තුළ ගොඩනැගෙමින් පවතින විශ්වාසය මැනවින් පිළිබිඹු කරන්නක් බව ද අමාත්යවරයා මෙහිදී පෙන්වා දුන්නේය.
මෙම නව භාණ්ඩ ප්රවාහන සේවාව හරහා මෙරට වෙළඳාම, අපනයන ක්රියාවලිය, සංචාරක ව්යාපාරයට අදාළ සැපයුම් දාමය ශක්තිමත් වන අතර, ශ්රී ලංකාව කලාපීය සැපයුම් මධ්යස්ථානයක් (Hub) බවට පත්කිරීමේ රජයේ අරමුණට ද විශාල සහායක් ලැබෙනු ඇත. එසේම, මෙරට තාරුණ්යයට නව රැකියා අවස්ථා රැසක් උත්පාදනය කිරීමට සහ දේශීය ගුවන් සේවා ක්ෂේත්රයේ දියුණුවට දායක වීමට මෙම සමාගමට ඇති හැකියාව ද අමාත්යවරයාගේ ඇගයීමට ලක්විය. මෙම සමාරම්භක අවස්ථාවට WEAIR ආයතනයේ උසස් නියෝජිතයින්, විදේශීය ආයෝජකයින් සහ ගුවන් සේවා ක්ෂේත්රයේ ප්රමුඛ පෙළේ පාර්ශ්වකරුවන් රැසක් සහභාගී වී සිටියහ.
