බස්නාහිර පළාතේ ජනතාවගේ ජල අවශ්‍යතා සපුරාලීම සඳහා පවතින විකල්ප ජල මූලාශ්‍ර හඳුනාගෙන ඒවා කාර්යක්ෂමව භාවිත කිරීමට නව සැලැස්මක් සකස් කිරීමට පියවර ගෙන තිබේ.
කොළඹ, ගම්පහ සහ කළුතර දිස්ත්‍රික්කවල පවතින පොදු හා පෞද්ගලික ළිං, වැව්, දියකඳුරු සහ අනෙකුත් භූගත ජල මූලාශ්‍ර මේ සඳහා යොදාගැනීම පිළිබඳ විශේෂ සාකච්ඡාවක් සෙත්සිරිපායේ පිහිටි නිවාස, ඉදිකිරීම් හා ජලසම්පාදන අමාත්‍යාංශයේදී පැවැත්වී ඇත.
ජලසම්පාදන අමාත්‍ය වෛද්‍ය සුසිල් රණසිංහ මහතාගේ සහ අමාත්‍යාංශ ලේකම්වරයාගේ ප්‍රධානත්වයෙන් පැවති සාකච්ඡාවට අදාළ දිස්ත්‍රික්ක තුනේ පළාත් පාලන ආයතන 53ක සභාපතිවරු සහභාගි වූ බව වාර්තාවේ සඳහන් වේ.
යෝජිත වැඩපිළිවෙළ යටතේ හඳුනාගන්නා ජල මූලාශ්‍රවල ගුණාත්මකභාවය සහ ධාරිතාව ඇගයීමෙන් පසු පානීය ජලය, ගෘහස්ථ කටයුතු, කෘෂිකර්මාන්තය සහ කර්මාන්ත ඇතුළු අවශ්‍යතා සඳහා සුදුසු පරිදි යොදාගැනීමට අපේක්ෂා කෙරේ.
මෙමගින් ජාතික ජලසම්පාදන හා ජලාපවහන මණ්ඩලය සපයන පිරිපහදු කළ ජලය වඩාත් කාර්යක්ෂමව භාවිත කිරීමටත්, පවතින ජල සම්පත් තිරසාරව කළමනාකරණය කිරීමටත් අවස්ථාව සැලසෙනු ඇතැයි අපේක්ෂා කෙරේ.
