අමෙරිකානු ජනාධිපති ඩොනල්ඩ් ට්රම්ප් මහතාගේ කතා ලේඛනවල අන්තර්ගතය කල්තියා දැනගැනීමේ අවස්ථාව අවභාවිත කරමින්, අන්තර්ජාල ඔට්ටු ඇල්ලීමේ වෙළඳපොළක් හරහා ඩොලර් 100,000කට වැඩි මුදලක් උපයා ගත් ධවල මන්දිරයේ ජ්යෙෂ්ඨ ටෙලිප්රොම්ප්ටර් ක්රියාකරු ගේබ්රියෙල් පෙරෙස්ගේ (Gabriel Perez) වැඩ වහාම ක්රියාත්මක වන පරිදි තහනම් කර තිබේ.
2016 වසරේ සිට ජනාධිපතිවරයාගේ ටෙලිප්රොම්ප්ටර් ක්රියාකරු ලෙස කටයුතු කළ ඔහු, ‘කල්ෂි’ (Kalshi) නැමති අනාවැකි පළ කිරීමේ අන්තර්ජාල වෙළඳපොළ හරහා ට්රම්ප් සිය කතාවලදී භාවිතා කිරීමට නියමිත වචන සහ මාතෘකා පිළිබඳව ඔට්ටු තබා ඇති බව අමෙරිකානු වෙළඳ භාණ්ඩ අනාගත වෙළඳ කොමිසමේ (CFTC) විමර්ශනවලදී හෙළි විය. කල්ෂි ආයතනයේ ආරක්ෂක අංශ විසින් මෙම අසාමාන්ය ඔට්ටු ඇල්ලීම් රටාව නියාමන බලධාරීන්ට දැනුම් දීමෙන් අනතුරුව මෙම වංචාව අනාවරණය කරගෙන ඇත.
මෙම ක්රියාව “ලැජ්ජා නැති ක්රියාවක්” ලෙස හඳුන්වමින් ජනාධිපතිවරයාගේ සෘජු උපදෙස් මත පෙරෙස්ව වැටුප් රහිත අනිවාර්ය නිවාඩු ගැන්වීමට ධවල මන්දිරය පියවර ගෙන තිබේ. විමර්ශනවලට අනුව, ඔහු රාජ්ය ප්රතිපත්ති ප්රකාශය ඇතුළු ට්රම්ප්ගේ ප්රධාන කතා 12කට වැඩි ප්රමාණයකදී මෙම අභ්යන්තර තොරතුරු අවභාවිත කර ඇත. අදාළ නිලධාරියා තමන් උපයා ගත් ලාභය නැවත රජයට ලබා දීමට සහ ඉදිරියේදී මෙවැනි ක්රියාවලින් වැළකී සිටීමට නියාමන ආයතන සමඟ එකඟතාවකට පැමිණීමට සාකච්ඡා කරමින් සිටින බව වාර්තා වේ.
