ලෝක සෞඛ්ය සංවිධානයේ (WHO) දකුණු-නැගෙනහිර ආසියානු කලාපීය කමිටුවේ 79 වන සැසිවාරය ටිමෝර්-ලෙස්ටේ රාජ්යයේ ඩිලි නුවරදී අද (07) නිල වශයෙන් ආරම්භ වන අතර, එය කලාපීය සෞඛ්ය ප්රතිපත්ති සහ ඉදිරි ගමන්මග තීරණය කෙරෙන අතිශය තීරණාත්මක සංධිස්ථානයක් ලෙස හඳුනාගත හැකිය. ලෝක සෞඛ්ය සංවිධානයේ අධ්යක්ෂ ජනරාල් වෛද්ය ටෙඩ්රොස් අධානොම් ගෙබ්රියේසස් මහතාගේ සහ කලාපීය සාමාජික රටවල සෞඛ්ය අමාත්යවරුන්ගේ සහභාගීත්වයෙන් පැවැත්වෙන මෙම සමුළුව සඳහා ශ්රී ලංකාව නියෝජනය කරමින් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ප්රමුඛ ජ්යෙෂ්ඨ නිලධාරීන් කණ්ඩායමක් එක්ව සිටිති. 2025 වසරේ කොළඹදී පැවති 78 වන සැසිවාරයේදී සභාපතිත්වයට පත් වූ ශ්රී ලංකාව, නව සභාපතිවරයා තෝරා ගන්නා තෙක් මෙවරද එම මුලසුන හොබවමින් කලාපීය සෞඛ්ය නායකත්වය සක්රීයව නිරූපණය කිරීම විශේෂත්වයකි.
මෙවර සැසිවාරයේ ප්රධාන අවධානය යොමු වී ඇත්තේ විශේෂිත සෞඛ්ය සේවා සඳහා සාධාරණ ප්රවේශයක් තහවුරු කිරීම සහ සෞඛ්ය මානව සම්පත් ශක්තිමත් කිරීම කෙරෙහි වන අතර, ඊට අදාළ ‘ඩිලි ප්රකාශනය’ (Dili Declaration) සම්මත කර ගැනීමටද නියමිතය. මීට අමතරව, විශ්වීය සෞඛ්ය ආවරණය (UHC) ශක්තිමත් කිරීම, සෞඛ්ය පද්ධති ඩිජිටල්කරණය, කෘත්රිම බුද්ධිය භාවිතය සහ ක්ෂය රෝගය ඇතුළු බෝවන රෝග තුරන් කිරීම කෙරෙහි මෙහිදී පුළුල් ලෙස සාකච්ඡා කෙරෙනු ඇත. කලාපීය සෞඛ්ය පද්ධතිවල පවතින අසමානතාවන් අවම කරමින් වඩාත් ඔරොත්තු දෙන සෞඛ්ය සේවාවක් ගොඩනැගීම මෙහි මූලික අරමුණ වන අතර, ශ්රී ලංකාවේ නිදහස් සෞඛ්ය සේවාවේ සාර්ථක අත්දැකීම් ජාත්යන්තර තලයට ගෙන යාමටද මෙයින් මග පෑදේ.
සැසිවාරයට සමගාමීව ශ්රී ලංකා සෞඛ්ය අමාත්යවරයා විසින් ඉන්දියාව, මාලදිවයින, බංග්ලාදේශය, භූතානය සහ ඉන්දුනීසියාව යන රටවල සෞඛ්ය අමාත්යවරුන් මෙන්ම WHO අධ්යක්ෂ ජනරාල්වරයා සමගද විශේෂ ද්විපාර්ශ්වික සාකච්ඡා පැවැත්වීමට සැලසුම් කර ඇත. මෙම රාජ්යතාන්ත්රික හමුවීම් හරහා ශ්රී ලංකාවේ සෞඛ්ය ක්ෂේත්රයේ ප්රගමනයට අවශ්ය ජාත්යන්තර සහයෝගීතාවය සහ තාක්ෂණික උපකාර ලබාගැනීමට විශාල පිටුවහලක් ලැබෙනු ඇත. කලාපීය රටවල් 10ක සෞඛ්ය සුරක්ෂිතතාව වෙනුවෙන් තීරණාත්මක සම්මුතීන් රැසක් එළඹෙන මෙම සමුළුව, ඉදිරි දශකයේ ආසියානු මහජන සෞඛ්ය ක්ෂේත්රයේ ගුණාත්මක වෙනසක් උදෙසා පදනම සකසනු නිසැකය.
