රටට බලපා ඇති දැඩි වියළි කාලගුණික තත්ත්වය හමුවේ වන සතුන් මුහුණපා සිටින දැඩි ජල අර්බුදයට විසඳුම් ලෙස විල්පත්තුව සහ හොරොව්පතාන ජාතික වන උද්යානවල වැව් හා පොකුණු වෙත බවුසර් මඟින් අඛණ්ඩව ජලය සැපයීමේ විශේෂ මෙහෙයුමක් ක්රියාත්මක කර තිබේ. අනුරාධපුර වනජීවී සහකාර අධ්යක්ෂ කාර්යාලයේ මඟපෙන්වීම යටතේ ක්රියාත්මක වන මෙම වැඩපිළිවෙළ හරහා වර්ෂාව නොමැතිකම හේතුවෙන් ස්වභාවික ජල මූලාශ්ර සිඳීයාමේ අවදානමට මුහුණපා සිටින වනජීවී ප්රජාවගේ ජීවිත ආරක්ෂා කර ගැනීම ප්රමුඛ අරමුණ වී ඇත.
විල්පත්තු ජාතික වන උද්යානයේ පවතින ප්රධාන වැව්වල යම් ජල ධාරිතාවක් මෙන්ම විල්ලු පිරී පැවතුණද, උද්යානය තුළ ඇති කෘත්රිම පොකුණු සඳහා බවුසර් මඟින් සහ සූර්ය බලශක්ති ජල මෝටර් යොදානිමින් දෛනිකව ජලය පිරවීමට වනජීවී නිලධාරීන් පියවර ගෙන තිබේ. මීට අමතරව, හොරොව්පතාන ජාතික උද්යානයේ පුලියන්කුලම වැව සහ කෘත්රිම ජල පොකුණු 9ක් ඇතුළුව ලීටර් 120,000ක පමණ ධාරිතාවක් පවත්වා ගනිමින් වන සතුන්ට අවශ්ය දෛනික ජල සැපයුම කිසිදු බාධාවකින් තොරව අඛණ්ඩව පවත්වාගෙන යාමට අවශ්ය යාන්ත්රණය සකසා ඇත.
දේශගුණික විපර්යාස හේතුවෙන් මතු වන මෙවැනි ස්වභාවික අභියෝග හමුවේ වනජීවී සංරක්ෂණ දෙපාර්තමේන්තුව වැනි ආයතන විසින් කඩිනමින් ක්රියාත්මක වීම මෙරට ජෛව විවිධත්වය සහ වන සතුන්ගේ ජීවිත ආරක්ෂා කර ගැනීමට ඉමහත් පිටිවහලක් වී තිබේ. ඉදිරියටත් වියළි කාලගුණික තත්ත්වය තවදුරටත් පැවතියහොත් ජාතික උද්යාන තුළ ජල කළමනාකරණය සඳහා වන මෙහෙයුම් තවදුරටත් පුළුල් කිරීමට අවශ්ය සූදානම පවතින අතර, ස්වභාවික පරිසර පද්ධතිවල සමබරතාව රැකගැනීම සඳහා මෙවැනි ආයතනික මැදිහත්වීම් අත්යවශ්ය සාධකයක් බවට පත්ව ඇත.
