සීඝ්රයෙන් සිදුවන දේශගුණික විපර්යාස හමුවේ කාන්තාරකරණය, නියඟය සහ භූමි හායනය ලෝකයම මුහුණ දෙන ප්රධානතම පාරිසරික අභියෝගය බවට පත්ව තිබේ. මේ පිළිබඳව ලෝකයේ අවධානය යොමු කරමින්, එක්සත් ජාතීන්ගේ කාන්තාරකරණය වැළැක්වීමේ සම්මුතියට (UNCCD) අනුව සෑම වසරකම ජුනි 17 වන දින “කාන්තාරකරණය හා නියඟය පිටුදැකීමේ ජාත්යන්තර දිනය” ලෙස සැමරේ.
මෙවර එහි තේමාව වන්නේ “Rangelands: Recognize. Respect. Restore.” (තෘණ භූමි: හඳුනාගනිමු. ගරු කරමු. ප්රතිසංස්කරණය කරමු.) යන්නයි. ආහාර සුරක්ෂිතතාව සහ ජෛව විවිධත්වය උදෙසා තෘණ භූමිවලින් ලැබෙන සුවිශේෂී දායකත්වය මෙවර අගය කරනු ලබයි.
ශ්රී ලංකාවේ වියළි, අතරමැදි සහ කඳුකර කලාපවල පිහිටි තෘණ භූමි පද්ධතීන් වනජීවී වාසස්ථාන ලෙස මෙන්ම පශු සම්පත් කර්මාන්තයේ පදනම ලෙස පරිසර සමතුලිතතාව ආරක්ෂා කිරීමට විශාල මෙහෙවරක් ඉටු කරයි. කෙසේ වෙතත්, අනවසර ඉඩම් අත්පත් කරගැනීම්, හිතාමතා ගිනි තැබීම්, අධික පශු පෝෂණය සහ ආක්රමණශීලී ශාක ව්යාප්තිය හේතුවෙන් මෙම පද්ධතීන් මේ වන විට දැඩි පිරිහීමකට ලක්ව ඇත. මෙහි ප්රතිඵලයක් ලෙස පාංශු ඛාදනය, ජල හිඟය සහ කෘෂිකාර්මික නිෂ්පාදන අඩුවීම වැනි ගැටලු මතුවෙමින් රටේ ආහාර සුරක්ෂිතතාවයට බලපෑම් එල්ල වේ.
මෙම අර්බුදයෙන් භූමිය බේරා ගැනීම අරමුණු කරගනිමින්, ශ්රී ලංකාවේ UNCCD කේන්ද්රීය ආයතනය වන පරිසර අමාත්යාංශය විසින් අද (17) දිනයේ විශේෂ දැනුවත් කිරීමේ වැඩසටහන් මාලාවක් සංවිධානය කර ඇත. අමාත්ය, නියෝජ්ය අමාත්ය සහ අමාත්යාංශ ලේකම්වරයාගේ ප්රධානත්වයෙන් පැවැත්වෙන මෙම වැඩසටහන්වලදී පාසල් සිසුන් සඳහා පාංශු සංරක්ෂණය හා තිරසර භූමි කළමනාකරණය පිළිබඳ ප්රායෝගික පුහුණුවක් කෘෂිකර්ම අමාත්යාංශයේ ස්වභාවික සම්පත් කළමනාකරණ මධ්යස්ථානය මගින් ලබා දෙන අතර, තියඩෝරා තෙල්මා තියටර් පදනම මගින් වීදි නාට්යයක් ද ඉදිරිපත් කෙරේ. මීට අමතරව මොරටුව විශ්වවිද්යාලයේ මහාචාර්ය රංගික හල්වතුර මහතා ප්රධාන දේශනය පවත්වන අතර, ‘එල්නිනෝ’ (El-Nino) දේශගුණික තත්ත්වය සහ ඉන් ශ්රී ලංකාවට ඇති විය හැකි බලපෑම් පිළිබඳව කාලගුණ විද්යා දෙපාර්තමේන්තුවේ අධ්යක්ෂ ප්රීතිකා මාධවී ජයකොඩි මහත්මිය සහ ජ්යෙෂ්ඨ කාලගුණ විද්යාඥ මලිත් ප්රනාන්දු මහතා විසින් විශේෂ දැනුවත් කිරීමක් සිදු කිරීමට නියමිතය.
