2026 ජගත් පරිසර දින ජාතික සැමරුම් නිල උත්සවය “දේශගුණ විපර්යාස අවම කර ගැනීම වෙනුවෙන් පෙළගැසෙමු” යන තේමාව යටතේ ජනාධිපති අනුර කුමාර දිසානායක මහතාගේ ප්රධානත්වයෙන් අද (05) පෙරවරුවේ කොළඹ අරලියගහ මන්දිරයේදී ඉතා අභිමානවත්ව පැවැත්විණි. සමාජ ආර්ථික සංවර්ධනය සහ පරිසරය අතර මනා සමතුලිතතාව රැකෙන පරිදි නිරෝගී ජන සමාජයක් උදෙසා ප්රමුඛතාව දීම වත්මන් රජයේ පරිසර ප්රතිපත්තියේ ප්රධාන අරමුණ වන අතර, මෙවර ජාතික පරිසර දින සැමරුම “කාබන් ශුන්ය” (Carbon Neutral) වැඩසටහන් ප්රමිතියට අනුව සිදුකිරීම සුවිශේෂී සන්ධිස්ථානයක් විය.
ජගත් පරිසර දිනයට සමගාමීව, අනුරාධපුර දිස්ත්රික්කයේ පිහිටි රිටිගල, අලියාවැටුණුවැව, මුලාගල, කෝන්කැටියාව සහ කල්ලංචිය යන වනාන්තර 05 රක්ෂිත වනාන්තර ලෙස ප්රකාශයට පත් කිරීම ජනාධිපතිවරයාගේ ප්රධානත්වයෙන් මෙහිදී සිදු කෙරුණි. මෙහිදී අදහස් දැක්වූ පරිසර අමාත්ය වෛද්ය ධම්මික පටබැඳි මහතා අනාවරණය කළේ, රජය විසින් ක්රියාත්මක කරන ‘වනස්පති’ වැඩසටහන යටතේ පසුගිය වසරේ (2025) ජගත් පරිසර දින සිට මේ දක්වා වසරක් වැනි කෙටි කාලයක් ඇතුළත මෙරට වනාන්තර 86ක් රක්ෂිත බවට පත් කිරීමට රජය සමත් වී ඇති බවයි.
මීට අමතරව, අලි-මිනිස් ගැටුමට තිරසාර විසඳුමක් ලෙස හම්බන්තොට සහ මොණරාගල දිස්ත්රික්ක කේන්ද්ර කරගනිමින් අලිමංකඩ (Elephant Corridors) 03ක් විවෘත කිරීම, කුඩා බුබුල දිය උල්පත හා කපුරැල්ල උණුදිය තෙත්බිම රක්ෂිත ලෙස ප්රකාශයට පත් කිරීම මෙන්ම මාගම වැලිකඳු වැටිය බලපෑමට යටත් වන ප්රදේශයක් ලෙස ප්රකාශයට පත් කිරීමද මෙහිදී සිදු විය. එසේම යල් පැන ගිය පරිසර අණපනත් සංශෝධනය කිරීමට පියවර ගෙන ඇති බවත්, පින්නවල අලි අනාථාගාරය අලි අභිජනන හා පර්යේෂණ මධ්යස්ථානයක් ලෙස සංවර්ධනය කරන බවත් අමාත්යවරයා වැඩිදුරටත් සඳහන් කළේය. මෙම අවස්ථාවට පරිසර නියෝජ්ය අමාත්ය ඇන්ටන් ජයකොඩි මහතා ඇතුළු රාජ්ය නිලධාරීන්, පරිසරවේදීන් සහ පර්යේෂකයින් රැසක් එක්ව සිටියහ.
