ලෝක ආහාර සුරක්ෂිතතා දිනය නිමිත්තෙන් ලෝක සෞඛ්ය සංවිධානය නිකුත් කළ විශේෂ වාර්තාවකට අනුව, ලොව පුරා අපිරිසිදු සහ අනාරක්ෂිත ආහාර පරිභෝජනය හේතුවෙන් වාර්ෂිකව මිලියන 1.5ක පමණ පිරිසකට දිවි අහිමි වේ. සෑම වසරකම මිලියන 866කට අධික ජනතාවක් වෛරස්, බැක්ටීරියා, පරපෝෂිතයන් සහ විෂ රසායනික ද්රව්ය අඩංගු ආහාර ගැනීම නිසා රෝගාතුර වන අතර, ඉන් රෝග 200කට අධික සංඛ්යාවක් හටගනී. මෙම තත්ත්වය මනුෂ්ය සෞඛ්යයට මෙන්ම ආර්ථිකයට ද දැඩි බලපෑමක් එල්ල කරයි.
මෙම ගෝලීය සෞඛ්ය අර්බුදයේ වැඩිම බලපෑමට ලක්ව ඇත්තේ වයස අවුරුදු 5ට අඩු කුඩා දරුවන්ය. ආහාර සුරක්ෂිතතාව නොමැතිකම නිසා හටගන්නා රෝගවලින් 40%ක්ම වාර්තා වන්නේ මෙම වයස් කාණ්ඩයෙනි. දරුවන්ගේ ප්රතිශක්තිකරණ පද්ධතියේ දුර්වලතා සහ මන්දපෝෂණය හේතුවෙන් සෑම වසරකම ලක්ෂ සංඛ්යාත කුඩා දරුවන් මියයති. අඩු සහ මධ්යම ආදායම් ලබන රටවලට මෙම රෝග තත්ත්වයන් හේතුවෙන් වාර්ෂිකව අමෙරිකානු ඩොලර් බිලියන 110කට අධික ආර්ථික අලාභයක් සිදුවන බව ලෝක සෞඛ්ය සංවිධානය ගණන් බලා තිබේ.
ආහාර සුරක්ෂිතතාවය සැමගේ වගකීමක් ලෙස හඳුන්වමින් ලෝක සෞඛ්ය සංවිධානය ප්රමිතීන් ආරක්ෂා කරන ලෙස ඉල්ලා සිටී. විශේෂයෙන්ම ආහාර නිෂ්පාදනයේදී ජාත්යන්තර ප්රමිතීන් අනුගමනය කිරීම, ආහාර පිසීමට පෙර සහ පසු දෑත් හා උපකරණ පිරිසිදු කිරීම, මස් හා මාළු වැනි ආහාර බැක්ටීරියා විනාශ වන තෙක් නියමිත උෂ්ණත්වයට පිස ගැනීම සහ අමු ආහාර හා පිසූ ආහාර වෙන් වෙන්ව නිසි උෂ්ණත්ව යටතේ ගබඩා කිරීම අත්යවශ්ය වේ. මෙම රෝග බොහෝමයක් නිවැරදි සෞඛ්ය පුරුදු අනුගමනය කිරීමෙන් වළක්වා ගත හැකි බැවින්, සැපයුම් දාමයේ සිට නිවසේ කුස්සිය දක්වා ප්රමිතිය රැකගැනීම ඉතා වැදගත් වේ.
