ජූනි 8 වැනි දිනට යෙදෙන ලෝක සාගර දිනය නිමිත්තෙන්, පරිසර නියෝජ්ය අමාත්ය ඇන්ටන් ජයකොඩි මහතාගේ ප්රධානත්වයෙන් කොළඹ වරාය නගරයේ මුහුදු පත්ල පවිත්ර කිරීමේ වැඩසටහනක් ඊයේ (ජූනි 06) සාර්ථකව පැවැත්විණි. සමුද්රීය පරිසර ආරක්ෂණ අධිකාරිය විසින් තවත් ආයතන කිහිපයක් සමඟ එක්ව සංවිධාන කළ මෙම වැඩසටහනේ ප්රධානතම අංගය වූයේ, දක්ෂ කිමිදුම් කණ්ඩායම් යොදවමින් සාගර පත්ලේ රැඳී තිබූ ප්ලාස්ටික්, පොලිතීන් සහ නොදිරන ඝන අපද්රව්ය විශාල ප්රමාණයක් ගොඩගැනීමයි.
මෙලෙස ගොඩගන්නා ලද අපද්රව්ය විද්යාත්මක ක්රමවේදවලට අනුව වර්ගීකරණය කර ප්රතිචක්රීකරණය සඳහා යොමු කෙරුණි. මෙම වැඩසටහන අගයමින් අදහස් දැක්වූ නියෝජ්ය අමාත්යවරයා පැවසුවේ, ශ්රී ලංකාව සතු සාගර සම්පත රැකගැනීම රටේ අනාගතය වෙනුවෙන් ඉටු කළ යුතු අත්යවශ්ය වගකීමක් බවත්, මෙවැනි ක්රියාකාරකම් සඳහා රාජ්ය සහ පෞද්ගලික අංශ ඒකාබද්ධව ලබාදෙන දායකත්වය අතිශයින් වැදගත් බවත්ය.
මෙම සාගර සුරකීමේ සත්කාරක පියවරට දායකත්වය සැපයූ ප්රමුඛ පෙළේ පෞද්ගලික ආයතන වෙත සමුද්රීය පරිසර ආරක්ෂණ අධිකාරිය විසින් ඇගයීම් උපහාර ලිපි පිරිනමන ලදී. ශ්රී ලාංකීය සාගර කලාපයේ තිරසාර පැවැත්ම තහවුරු කිරීම සඳහා සාගරයට අපද්රව්ය බැහැර කිරීම වැළැක්වීමට දැඩි නීතිමය ක්රියාමාර්ග මෙන්ම, අඛණ්ඩව මෙවැනි පිරිසිදු කිරීමේ වැඩසටහන් ක්රියාත්මක කිරීමට රජයේ පාරිසරික සංරක්ෂණ වැඩපිළිවෙළ යටතේ පියවර ගෙන ඇත.
