චීනය සහ උතුරු කොරියාව අතර පවතින රාජ්ය තාන්ත්රික සබඳතා මේ වන විට “නව ඓතිහාසික ආරම්භක ස්ථානයකට” පැමිණ ඇති බව චීන ජනාධිපති ෂී ජින්පින් (Xi Jinping) මහතා පවසයි. උතුරු කොරියානු නායක කිම් ජොන් උන් (Kim Jong Un) මහතා සමඟ පැවැත්වෙන තීරණාත්මක ද්විපාර්ශ්වික රාජ්ය නායක සමුළුව සඳහා අද (08) උදෑසන ප්යොන්යැන්ග් (Pyongyang) අගනුවර වෙත ළඟා වීමෙන් පසු එරට රාජ්ය මාධ්ය වෙත විශේෂ ප්රකාශයක් නිකුත් කරමින් ජනාධිපතිවරයා මේ බව සඳහන් කළේය.
මෙම වසර තුළ චීන ජනාධිපතිවරයා සිදු කරන ප්රථම විදේශ සංචාරය මෙය වන අතර, උතුරු කොරියාව සමඟ පවතින සබඳතා අඛණ්ඩව සංවර්ධනය කිරීම සහ සියලු ක්ෂේත්රයන් ඔස්සේ අන්යෝන්ය හුවමාරු කටයුතු ශක්තිමත් කිරීම චීනයේ නොසැලෙන ප්රතිපත්තියක් බව ද හෙතෙම කියා සිටියේය. කලාපීය ආරක්ෂාව සහ ස්ථාවරත්වය අනතුරේ හෙළන අධිරාජ්යවාදී සහ මිලිටරිවාදී බලපෑම්වලට තමන් දැඩි ලෙස විරුද්ධ වන බව ද ෂී ජින්පින් මහතා මෙහිදී වැඩිදුරටත් අවධාරණය කළේය.
ප්යොන්යැන්ග් අගනුවර වෙත ළඟා වූ චීන ජනාධිපතිවරයා සහ ඔහුගේ බිරිඳ වෙනුවෙන් උතුරු කොරියානු නායක කිම් ජොන් උන් සහ රි සෝල් ජු (Ri Sol Ju) මහත්මිය විසින් රතු පලස් එලමින් ඉතා ඉහළ රාජ්ය ගෞරව සහිත උණුසුම් පිළිගැනීමක් පිරිනමා තිබේ. ප්යොන්යැන්ග් හි කිම් ඉල් සුං (Kim Il Sung) චතුරශ්රයේදී ආචාර වෙඩි මුර 21ක් පිරිනමමින්, දෙරටේ ජාතික ගී වාදනය කරමින්, දැවැන්ත ජනකායකගේ සහ වර්ණවත් බැලූන ආචාර මධ්යයේ මෙම රාජ්ය පිළිගැනීමේ උත්සවය උත්කර්ෂවත් අන්දමින් පවත්වා ඇති බව චීන ‘ෂින්හුවා’ (Xinhua) පුවත් සේවය වාර්තා කරයි.
