ඉරාන යුද්ධය හේතුවෙන් ඇමෙරිකාවට රුසියානු-යුක්රේන යුද්ධය අමතක වී ඇතැයි යුක්රේන ජනාධිපති ව්ලොදිමීර් සෙලෙන්ස්කී චෝදනා කරයි. ජර්මානු රූපවාහිනී නාලිකාවක් සමඟ පැවැති සම්මුඛ සාකච්ඡාවකට එක්වෙමින් ඔහු පෙන්වා දුන්නේ ඇමෙරිකානු ජනාධිපති ඩොනල්ඩ් ට්රම්ප් මේ වන විට ඉරානය සමඟ පැහැදිලි ගනුදෙනුවක් ඇති කර ගැනීමට ප්රමුඛතාව ලබා දී ඇති බැවින් යුක්රේනය කෙරෙහි අවධානය යොමු කිරීමට කාලයක් නොමැති බවයි.
රුසියාව සමඟ සාම සාකච්ඡා සඳහා මැදිහත් වූ ට්රම්ප්ගේ නියෝජිතයන් වන ස්ටීව් විට්කොෆ් සහ ජැරඩ් කුෂ්නර් මේ වන විට පාකිස්ථානය හරහා ඉරාන-ඇමෙරිකානු සටන් විරාමයක් සඳහා වෙහෙසෙන බවත්, එම හේතුවෙන් රුසියාවට එරෙහිව එල්ල කළ යුතු රාජ්ය තාන්ත්රික බලපෑම ලිහිල් වී ඇති බවත් සෙලෙන්ස්කී අවධාරණය කළේය. පසුගිය මාර්තු මාසයේදී ඉරාන යුද්ධය ආරම්භ වීමත් සමඟ යුක්රේන-රුසියානු සාම සාකච්ඡා අඩපණ වී ඇති අතර, පෙබරවාරි මාසයෙන් පසු දෙරටේ නියෝජිතයන් අතර කිසිදු හමුවක් පවත්වා නොමැති බව ද ඔහු හෙළි කළේය.
ඇමෙරිකානු අවි ආයුධ සැපයුම ප්රමාද වීම සහ ගුවන් ආරක්ෂක පද්ධති සඳහා අවශ්ය මිසයිල හිඟ වීම යුක්රේනයේ ඉදිරි යුද මෙහෙයුම්වලට දැඩි අවදානමක් වී ඇති බව ද ජනාධිපතිවරයා පවසයි. සිය ජර්මානු සංචාරය අතරතුර චාන්සලර් ෆ්රෙඩ්රික් මර්ස් හමුවූ සෙලෙන්ස්කී, අනතුරුව නෝර්වේ රාජ්යයේදී අග්රාමාත්ය ජෝනාස් ගාර් ස්ටෝර් සමඟ ආරක්ෂක ගිවිසුමකට එළඹුණි. එම ගිවිසුම යටතේ ඉදිරියේදී යුක්රේන ඩ්රෝන යානා නෝර්වේ රාජ්යය තුළ නිෂ්පාදනය කිරීමට ද එකඟතාව පළ වී තිබේ.
