යුක්රේනය වෙත යුරෝපා සංගමයේ (EU) ‘සහකාර සාමාජිකත්වයක්’ (Associate Membership) පිරිනැමීම සඳහා ජර්මනිය ඉදිරිපත් කර ඇති යෝජනාව සම්පූර්ණයෙන්ම අසාධාරණ බව යුක්රේන ජනාධිපති ව්ලැඩිමීර් සෙලෙන්ස්කි මහතා පවසයි. යුරෝපා සංගමයේ නායකයන් වෙත විශේෂ ලිපියක් යොමු කරමින් ඔහු පෙන්වා දෙන්නේ එවැනි තත්ත්වයක් තුළ සමූහය අභ්යන්තරයේ යුක්රේනයට කිසිදු තීරණාත්මක ඡන්ද බලයක් හෝ හඬක් හිමි නොවන බවයි.
රුසියානු ආක්රමණයත් සමඟ වසර හතරක් පුරා ඇදී යන යුද වාතාවරණය නිමා කිරීමේ අතුරු පියවරක් ලෙස, යුක්රේනයට ඡන්ද බලයකින් තොරව යුරෝපා සංගමයේ නිල රැස්වීම් සඳහා සහභාගී වීමට ඉඩ සැලසෙන පරිදි මෙම සහකාර සාමාජිකත්ව යෝජනාව ඉදිරිපත් කර තිබුණේ ජර්මානු චාන්සලර් ෆ්රීඩ්රිච් මර්ස් (Friedrich Merz) විසිනි. ඊට ප්රතිචාර දක්වමින් සෙලෙන්ස්කි මහතා සිය ලිපියෙන් අවධාරණය කර ඇත්තේ, යුක්රේනය යුරෝපා සංගමයට ඇතුළත් කර ගැනීමට දැඩි ලෙස විරුද්ධ වූ හංගේරියානු අග්රාමාත්ය වික්ටර් ඕර්බන් පසුගිය මාසයේ පැවැති මැතිවරණයෙන් පරාජයට පත්වීමත් සමඟ, යුක්රේනයේ පූර්ණ සාමාජිකත්වය වෙනුවෙන් සාකච්ඡා ඉදිරියට ගෙනයෑමට දැන් කදිම අවස්ථාවක් උදාවී ඇති බවයි.
යුරෝපීය කවුන්සිලයේ සභාපති ඇන්ටෝනියෝ කොස්තා, යුරෝපීය කොමිසමේ සභාපතිනි උර්සුලා වොන් ඩර් ලේයන් සහ යුරෝපා සංගමයේ වාරික සභාපතිත්වය දරන සයිප්රස් ජනාධිපති නිකොස් ක්රිස්ටෝඩෝලයිඩස් වෙත මෙම ලිපිය යොමු කර තිබේ. යුද්ධය පවතින සමය පුරාම යුරෝපා නායකයන් දැක්වූ සහයෝගයට ස්තුතිය පළ කරන සෙලෙන්ස්කි මහතා, සමස්ත යුරෝපයම රුසියානු ආක්රමණයෙන් ආරක්ෂා කිරීම සඳහා යුක්රේනය පවුරක් සේ නැගී සිටින්නේ අර්ධ වශයෙන් නොව පූර්ණ වශයෙන් බැවින්, යුක්රේනයට යුරෝපය තුළ සමාන අයිතිවාසිකම් සහ සාධාරණ ප්රවේශයක් හිමිවිය යුතු බව වැඩිදුරටත් සඳහන් කරයි.
