ලෝක නායකයන් බිය ගැන්වීම වෙනුවට ගෞරවය දිනා ගැනීමට උත්සාහ කළ යුතු බව පවසමින් බ්රසීල ජනාධිපති ලුයිස් ඉනාසියෝ ලූලා ද සිල්වා (Luiz Inacio Lula da Silva), ඇමෙරිකානු ජනාධිපති ඩොනල්ඩ් ට්රම්ප්ගේ විදේශ ප්රතිපත්තිය දැඩි ලෙස විවේචනය කර තිබේ. ස්පාඤ්ඤයේ ‘El Pais’ පුවත්පත සමඟ පැවැති සම්මුඛ සාකච්ඡාවකදී ඔහු මේ බව සඳහන් කළේය.
“උදෑසන අවදි වී වෙනත් රටකට තර්ජනය කිරීමට ට්රම්ප්ට කිසිදු අයිතියක් නැත” යනුවෙන් ලූලා ප්රකාශ කළේය. ඉරාන ශිෂ්ටාචාරය විනාශ කරන බවට අප්රේල් 07 වැනිදා ට්රම්ප් විසින් සිදුකළ ප්රකාශය මෙහිදී විශේෂයෙන් හෙළා දකින ලදී. එවැනි ක්රියාවන් සඳහා ට්රම්ප් පත්වී නොමැති බවත්, ඇමෙරිකානු ආණ්ඩුක්රම ව්යවස්ථාවෙන් පවා ඊට අවසර නොලැබෙන බවත් ඔහු පෙන්වා දුන්නේය.
වොෂින්ටනයේ මිලිටරි සහ ආර්ථික බලය යොදාගනිමින් ලෝකයට නීති පැනවීමට උත්සාහ කිරීම “වැරදි සහගත ක්රීඩාවක්” ලෙස ඔහු හැඳින්වීය. බලවතුන් සාමය පවත්වා ගැනීම සඳහා වැඩි වගකීමක් ගත යුතු බවත්, කිසිවෙකුට අන් අය බිය ගැන්වීමට අයිතියක් නොමැති බවත් ලූලා අවධාරණය කළේය.
ඇමෙරිකානු විශේෂ බලකායන් විසින් වෙනිසියුලානු ජනාධිපති නිකොලස් මදුරෝව අත්අඩංගුවට ගැනීමෙන් පසුව පවතින තත්ත්වය පිළිබඳව ද ඔහු අදහස් දැක්වීය. වොෂින්ටනයේ මැදිහත්වීමකින් තොරව වෙනිසියුලාව තුළ නිදහස් මැතිවරණයක් පැවැත්විය යුතු බව ඔහුගේ මතයයි.
බ්රසීල ජනාධිපතිවරයා හෙට (17) බාර්සිලෝනාහිදී ස්පාඤ්ඤ අග්රාමාත්ය පේද්රෝ සැන්චෙස් හමුවීමට නියමිත අතර, එහිදී ද මෙම ගෝලීය දේශපාලනික තත්ත්වයන් පිළිබඳව දීර්ඝ ලෙස සාකච්ඡා කිරීමට නියමිතය.
