ඩොමිනිකන් ජනරජයේ (Dominican Republic) සුප්රකට බයාහිබේ වෙරළ තීරයේ පිහිටි “Viva Wyndham Dominicus Beach” නමැති තරු හතරේ සුඛෝපභෝගී සංචාරක හෝටල් පරිශ්රයක හටගත් මහා පරිමාණ ගින්නක් හේතුවෙන් එහි රැඳී සිටි විදේශීය සංචාරකයින් 1,690කට අධික පිරිසක් වහාම ඉවත් කිරීමට බලධාරීන් කටයුතු කර තිබෙනවා. මෙම දරුණු ගින්නෙන් හෝටලයේ නවාතැන් ගෙන සිටි 46 හැවිරිදි ෆ්රැන්සෙස්කා වැලන්ටිනෝ නමැති ඉතාලි ජාතික කාන්තාවක අවාසනාවන්ත ලෙස ජීවිතක්ෂයට පත්ව ඇති අතර, තවත් පුද්ගලයින් 9 දෙනෙකු තුවාල ලබා ඇති බවයි එරට හදිසි අනතුරු මෙහෙයුම් මධ්යස්ථානය (COE) තහවුරු කරන්නේ. ගින්න හටගත් අවස්ථාවේදී බියට පත් වූ සංචාරකයින් විශාල පිරිසක් දිවි බේරාගැනීම සඳහා වෙරළ දෙසට දිව ගොස් ඉන් පසුව කරවටක් දියෙහි ගිලෙමින් මුහුදේ රැඳී සිටින අයුරු දැක්වෙන වීඩියෝ දර්ශන ද සමාජ මාධ්ය වෙත මුදාහැර තිබුණා.
ගිනි නිවන ඒකක 15කට අධික ප්රමාණයක් පැමිණ පැය ගණනාවක මෙහෙයුමකින් පසු ගින්න පාලනය කිරීමට සමත් වුවද, හෝටල් පරිශ්රයේ තිබූ පොල් අතු සහ තල කොළවලින් සෙවිලි කරන ලද (Thatched-roof) සාම්ප්රදායික වහලවල් සහිත ගොඩනැගිලි රැසක් සම්පූර්ණයෙන්ම විනාශ වී තිබෙනවා. ප්රදේශයේ පැවති තද සුළං තත්ත්වය සහ වහලවල් සඳහා භාවිත කර තිබූ පහසුවෙන් ගිනි ඇවිළෙන සුළු ද්රව්ය හේතුවෙන් ගින්න ඉතා වේගයෙන් හෝටලය පුරා ව්යාප්ත වූ බවයි මූලික විමර්ශනවලදී හෙළි වී ඇත්තේ. කෙසේ වුවත් හෝටල් සේවකයින්ගේ කඩිනම් ක්රියාකාරිත්වය හේතුවෙන් අනෙක් සියලුම දෙනා නිරුපද්රිතව බේරාගෙන අවට හෝටල් වෙත යොමු කිරීමට හැකි වූ බවත්, ගින්න හටගැනීමට හේතුව සෙවීම සඳහා බලධාරීන් මේ වන විට පුළුල් පරීක්ෂණයක් ආරම්භ කර ඇති බවත් විදෙස් මාධ්ය වාර්තා කරනවා.
