පාසල යනු දරුවෙකුට ආදරය සහ රැකවරණය අත්වන වඩාත් විශ්වාසදායක ස්ථානය බවට පත් කිරීම රජයේ මූලික අරමුණ බව අග්රාමාත්ය මෙන්ම අධ්යාපන, උසස් අධ්යාපන හා වෘත්තීය අධ්යාපන අමාත්ය ආචාර්ය හරිනි අමරසූරිය මහත්මිය ප්රකාශ කළාය. ඇය මේ බව සඳහන් කළේ අද (අප්රේල් 20) දින පැවැති විශේෂ වැඩසටහනක සමාරම්භක උත්සවයට එක්වෙමිනි.
අධ්යාපන අමාත්යාංශය සහ ‘රූම් ටු රීඩ් ශ්රී ලංකා’ (Room to Read Sri Lanka) ආයතනය ඒකාබද්ධව සංවිධානය කළ මෙම වැඩසටහනේ ප්රධාන අරමුණ වන්නේ පාසල් සිසුන්ගේ මනෝ සමාජීය යහපැවැත්ම වර්ධනය කිරීම සහ ඔවුන්ට ගුණාත්මක වෘත්තීය මාවතක් කරා ගමන් කිරීමට අවශ්ය මගපෙන්වීම් ලබා දීමයි.
මෙම උත්සවයේදී ශිෂ්ය උපදේශන හා වෘත්තීය මාර්ගෝපදේශ ක්ෂේත්රයට අදාළ නව මාර්ගෝපදේශ සංග්රහයක් ද එළිදක්වන ලදී. මෙහිදී උපදේශන ගුරුවරුන්ගේ වෘත්තීය දැනුම ඉහළ නැංවීම සඳහා වන ධාරිතා සංවර්ධන මොඩියුල, කළමනාකරණ අත්පොත් සහ 21 වන සියවසට ගැළපෙන නිපුණතා මොඩියුල හඳුන්වා දී ඇත. එසේම සිසුන් විවිධ ගැටලුවලට පෙලඹීම වළක්වා ගැනීමට අවශ්ය ක්රියාමාර්ග සහ දෙමාපිය සහයෝගීතාව වර්ධනය කිරීමේ විශේෂ වැඩසටහන් ද මීට ඇතුළත් වේ.
යහපත් පුරවැසියන් බිහි කිරීමේදී පාසල තුළ හිතකර මනෝ සමාජීය පරිසරයක් තිබීම අත්යවශ්ය බවත්, ඒ සඳහා අධ්යාපන පද්ධතියේ සිටින සියලුම නිලධාරීන් වගකීමෙන් බැඳී සිටින බවත් අග්රාමාත්යවරිය මෙහිදී සිහිපත් කළාය. දරුවන්ට ආරක්ෂිත පරිසරයක් නිර්මාණය කිරීම රජයේ ප්රමුඛතම වගකීමක් බව ද ඇය වැඩිදුරටත් අවධාරණය කළාය.
