English 
මැදිරිගිරිය ධාන්‍ය සුරැකුම් මධ්‍යස්ථානය ගොවි ජන අයිතියට
කෘෂි නිෂ්පාදන වර්ධනය කරමින් රටේ යහපත් ආර්ථීකයක් ගොඩනැගීමට මෙන්ම ගොවියාට සාධාරණ මිලක් ලබාදෙමින් ඔවුන් ණය බරින් නිදහස් කර ගැනීමට ගෙන යන ජාතික සංවර්ධන සැලසුම් අතර ප්‍රමුඛ ව්‍යාපෘතියක් ලෙස ගොවි ජනතාවගේ ධාන්‍ය සුරැකුම් මධ්‍යස්ථාන දිවයින පුරා ස්ථාපිත කිරීමේ වැඩපිළිවෙළක් ජනාධිපතිවරයාගේ මගපෙන්වීමෙන් ක්‍රියාවට නංවා තිබේ.
ඒ යටතේ ඉදිකෙරුණු පොළොන්නරුව මැදිරිගිරිය ධාන්‍ය සුරැකුම් මධ්‍යස්ථානය අද (09) පෙරවරුවේ ජනතා අයිතියට පැවරුණේ ජනාධිපති මෛත්‍රීපාල සිරිසේන මහතා අතිනි.
ධාන්‍ය සුරැකුම් මධ්‍යස්ථානය විවෘත කළ ජනාධිපතිවරයා එහි නිරික්ෂණ චාරිකාවකට ද එක් විය.
පසුගිය කන්නගේ වගා හානි සිදුවූ ගොවීන්ට වන්දි ප්‍රදානය කිරීම ද මෙහිදී සිදු කෙරුණු අතර ගොවීන් 3634 දෙනෙකු වෙනුවෙන් රුපියල් කෝටි හත හමාරකට ආසන්න මුදලක් වන්දි වශයෙන් ප්‍රදානය කෙරිණි.
එය සංකේවත් කරමින් ගොවීන් 20 දෙනෙකු වෙත වන්දි ප්‍රදානය කිරීම ජනාධිපතිවරයා අතින් සිදු විය.
එමෙන්ම ධාන්‍ය සුරැකුම් මධ්‍යස්ථානය වෙත වී භාරදුන් ගොවින් තිදෙනෙකු වෙත ගුදම් කුවිතාන්සි පිළිගැන්වීම සිදුවූයේ ද ජනාධිපතිවරයා අතිනි.
ප්‍රදේශයේ මහා සංඝරත්නය ද, උතුරු මැද පළාත් හිටපු ප්‍රධාන අමාත්‍ය පේෂල ජයරත්න, මුදල් අමාත්‍යාංශයේ ලේකම් එස්.ආර්. ආටිගල, පොළොන්නරුව දිස්ත්රික් ලේකම් පණ්ඩුක අබේවර්ධන යන මහත්වරුන් ඇතුථ නිලධාරින් මෙම අවස්ථාවට එක්ව සිටියහ.