හිඟුරක්ගොඩ ප්රාදේශීය සභාවේ වාර්ෂික අය-වැය පරාජයට පත්වීම හේතුවෙන්, එහි සභාපතිවරයාට ධුරයෙන් ඉල්ලා අස්වන ලෙස උතුරුමැද පළාත් පාලන කොමසාරිස්වරයා කළ දැනුම්දීම සම්පූර්ණයෙන්ම නීත්යානුකූල සහ නිවැරදි බව ශ්රේෂ්ඨාධිකරණය තීන්දු කර තිබෙනවා. ඒ අනුව, තමාගේ මූලික අයිතිවාසිකම් කඩවූ බව පවසමින් හිඟුරක්ගොඩ ප්රාදේශීය සභාවේ හිටපු සභාපති සුසන්ත මහතා ගොනු කර තිබූ මූලික අයිතිවාසිකම් (FR) පෙත්සම ගාස්තු රහිතව නිෂ්ප්රභ කිරීමටයි අධිකරණය පියවර ගත්තේ.
මෙම තීන්දුව ප්රකාශයට පත්කරන ලද්දේ ශ්රේෂ්ඨාධිකරණ විනිසුරුවරුන් වන අර්ජුන ඔබේසේකර, සම්පත් අබේකෝන් සහ සම්පත් විජේරත්න යන මහත්වරුන්ගෙන් සමන්විත ත්රිපුද්ගල විනිසුරු මඬුල්ලක් විසිනි. විනිසුරු සම්පත් අබේකෝන් සහ සම්පත් විජේරත්න යන මහත්වරුන්ගේ එකඟත්වයෙන් යුතුව විනිසුරු අර්ජුන ඔබේසේකර මහතා විසින් මෙම නඩු තීන්දුව ලියා ප්රකාශයට පත් කර තිබේ.
නඩු තීන්දුවේ සඳහන් කරුණු අනුව, 2012 වසරේ පළාත් පාලන විශේෂ විධිවිධාන පනතේ සංශෝධිත 169 වගන්තියට අනුව ප්රාදේශීය සභාවක අය-වැය පරාජයට පත්වුවහොත්, සභාපතිවරයා විසින් යළිත් අය-වැය යෝජනා ඉදිරිපත් කළ යුතුය. එසේ ඉදිරිපත් කර සති දෙකක් ඇතුළත එම යෝජනා සම්මත කර ගැනීමට අපොහොසත් වුවහොත් සභාපතිවරයා ධුරයෙන් ඉල්ලා අස්විය යුතු බව පනතේ පැහැදිලිව දක්වා ඇත.
දෙපාර්ශවයම ඉදිරිපත් කළ කරුණු සහ පූර්වාදර්ශ නඩු තීන්දු විමර්ශනය කිරීමේදී, පෙත්සම්කාර හිටපු සභාපතිවරයා පනතේ 169 වගන්තිය ප්රකාරව අය-වැය සම්මත කර ගැනීමට අපොහොසත් වී ඇති බව අධිකරණයට පැහැදිලි වී තිබේ. ඒ අනුව ඔහු ධුරයෙන් ඉල්ලා අස්විය යුතු බවත්, පළාත් පාලන කොමසාරිස්වරයා සභාවේ ලේකම් එච්.එම්. චන්ද්රසේකර මහතා වෙත ලිපියක් යොමු කරමින් කළ දැනුම්දීමෙන් පෙත්සම්කරුගේ කිසිදු මූලික අයිතිවාසිකමක් කඩවී නොමැති බවත් ශ්රේෂ්ඨාධිකරණය අවධාරණය කළේය. මෙම නඩුවේ වගඋත්තරකරුවන් ලෙස ප්රාදේශීය සභාවේ ලේකම්වරයා සහ මන්ත්රීවරුන් පිරිසක් නම් කර තිබුණි.
