ලංකාවේ ප්රධාන විදේශ විනිමය උපයන මාර්ගයක් වන පොල් කොහු සහ කෙඳි ආශ්රිත නිෂ්පාදන ක්ෂේත්රය මුහුණ දී ඇති දැඩි අමුද්රව්ය හිඟය සහ නිෂ්පාදන පිරිවැය ඉහළ යාමේ අර්බුදයට විසඳුම් සෙවීම සඳහා අපනයන සංවර්ධන මණ්ඩලය (EDB) සක්රියව මැදිහත් වී තිබෙනවා. 2025 වසරේදී ඇමෙරිකානු ඩොලර් මිලියන 294ක අපනයන ආදායමක් උපයා ගනිමින් සියයට 22.5ක කැපී පෙනෙන වර්ධනයක් වාර්තා කළ මෙම ක්ෂේත්රය, දැනට පවතින කෙඳි හිඟය හේතුවෙන් ජාත්යන්තර ඇණවුම් නියමිත වේලාවට ලබා දීමට නොහැකිව දැඩි බලපෑමකට ලක්ව ඇති බවයි වාර්තා වන්නේ.
මේ සම්බන්ධයෙන් කර්මාන්තයේ ස්ථාවරත්වය උදෙසා කෙටි හා දිගුකාලීන උපායමාර්ගික පියවර හඳුනා ගැනීමේ විශේෂ සාකච්ඡාවක් අපනයන සංවර්ධන මණ්ඩලයේ සභාපති සහ ප්රධාන විධායක නිලධාරී මංගල විජේසිංහ මහතාගේ මුලසුනත්වයෙන් පසුගියදා පැවැත්වුණා. සැපයුම් දාමය විධිමත් කිරීම සහ අපනයනකරුවන්ට ප්රතිපත්තිමය සහන සැලසීම මෙහිදී ප්රධාන වශයෙන් සාකච්ඡා විය.
මෙම තීරණාත්මක සාකච්ඡාව සඳහා රාජ්ය ආයතන නියෝජනය කරමින් පොල් වගා කිරීමේ මණ්ඩලයේ (CCB) සභාපති ආචාර්ය සුනිමල් ජයකොඩි, EDB අපනයන කෘෂිකර්ම අධ්යක්ෂ ජනක් සංජීව බදුගම, ජාතික ශාක නිරෝධායන සේවයේ (NPQS) අතිරේක අධ්යක්ෂ ජී.ජී.ඩී. ලලානි, පොල් සංවර්ධන අධිකාරියේ (CDA) සැකසුම් සංවර්ධන අධ්යක්ෂ කේ.ඒ.එන්.පී. කනුගල සහ Zoom තාක්ෂණය ඔස්සේ සම්බන්ධ වූ පොල් පර්යේෂණ ආයතනයේ (CRI) වැඩබලන අධ්යක්ෂ ආචාර්ය නයනි එස්. ආරච්චිගේ යන මහත්ම මහත්මීන් සහභාගී වූහ.
එමෙන්ම පෞද්ගලික අංශය සහ කර්මාන්ත සංගම් වෙනුවෙන් ශ්රී ලංකා කොහු සහ ඒ ආශ්රිත නිෂ්පාදන නිෂ්පාදකයින්ගේ සංගමය, පොල් ආශ්රිත උපස්තර අපනයනකරුවන්ගේ සංගමය, ලංකා කොහු කෙඳි නිෂ්පාදකයින්ගේ සංගමය සහ ශ්රී ලංකා ජාතික අපනයනකරුවන්ගේ මණ්ඩලයේ නියෝජිතයන් ද මේ සඳහා එක්ව සිටියහ. පොල් කෙඳි අපනයන අංශය මුහුණ දෙන ව්යූහාත්මක සහ මෙහෙයුම් අභියෝග ජය ගනිමින් ජාත්යන්තර වෙළෙඳපොළ ජය ගැනීමට අවශ්ය උපරිම සහයෝගය සහ සක්රිය සම්බන්ධීකරණ භූමිකාව අඛණ්ඩව ඉටු කරන බව අපනයන සංවර්ධන මණ්ඩලය මෙහිදී සහතික කර සිටියේය.
