අග්නිදිග ආසියානු රොටරැක්ට් තොරතුරු මධ්යස්ථානයේ ප්රමුඛ කලාපීය රැස්වීම වන 2026 SEARIC සමුළුවේ සත්කාරකත්වය ප්රථම වරට මෙරටට හිමිවීමත් සමඟ, කලාපීය තරුණ නායකත්ව සංවර්ධන වේදිකාවක් ලෙස ශ්රී ලංකාව ජාත්යන්තර අවධානය දිනා ගැනීමට සමත්ව තිබේ. එළඹෙන සැප්තැම්බර් 11 සිට 13 දක්වා පෙගසස් රීෆ් හෝටලයේදී පැවැත්වෙන මෙම තෙදින සමුළුව සඳහා රටවල් හයකින් නියෝජිතයින් 500 කට අධික පිරිසක් සහභාගී වීමට නියමිත අතර, රොටරි ජාත්යන්තර දිස්ත්රික්ක 3220 (RID 3220) යටතේ ක්රියාත්මක වන ශ්රී ලංකාව සහ මාලදිවයින මෙම දැවැන්ත ජාත්යන්තර සත්කාරකත්වය දරනු ලබයි.
“වෘත්තීන් සහ සේවාවන්හි අනාගතයේ තාක්ෂණයේ කාර්යභාරය” යන තේමාව පෙරදැරිව ක්රියාත්මක වන මෙම සමුළුව හරහා නැගී එන තාක්ෂණයන් කර්මාන්ත සහ මිනිසුන් වැඩ කරන ආකාරය පරිවර්තනය කරන පසුබිමක, අනාගත වැඩසටහන් මෙන්ම ප්රජා සේවාවන් ශක්තිමත් කිරීමට තාක්ෂණය යොදා ගන්නා ආකාරය පිළිබඳව තරුණ නායකයින් ගැඹුරින් සාකච්ඡා කරනු ඇත. දින තුනක් පුරා විහිදෙන නායකත්ව හා වෘත්තීය සංවර්ධන සැසි, සංස්කෘතික අත්දැකීම් සහ ජාලකරණ අවස්ථා මඟින් සහභාගී වන නියෝජිතයින්ට අන්යෝන්ය දැනුම සහ අත්දැකීම් හුවමාරු කර ගැනීමට පුළුල් අවකාශයක් නිර්මාණය වේ.
මෙවැනි ඉහළ පෙළේ ජාත්යන්තර සමුළුවක් මෙරට පැවැත්වීම රොටරැක්ට් ව්යාපාරයෙන් ඔබිනු ගොස්, ගෝලීය තරුණ නායකත්ව වැඩසටහන් සහ කලාපීය සහයෝගීතාව සඳහා කේන්ද්රස්ථානයක් ලෙස ශ්රී ලංකාව ජාත්යන්තරය තුළ තවදුරටත් ස්ථානගත කිරීමට ප්රබල රුකුලක් වනු ඇත. මෙරටට පැමිණෙන සිය ගණනක් විදේශීය නියෝජිතයින් හරහා ශ්රී ලංකාවේ ආගන්තුක සත්කාරය, සංස්කෘතිය සහ විභවය ලෝකයට ප්රදර්ශනය වන අතරම, ඉදිරි ජාත්යන්තර රැස්වීම් සහ ආයෝජන ආකර්ෂණය කර ගැනීම සඳහා ද මෙමඟින් පුළුල් දොරටුවක් විවර වනු ඇතැයි අපේක්ෂා කෙරේ.
