මහා භාණ්ඩාගාරයේ සන්නිවේදන පද්ධතිය හැක් කරමින් ඔස්ට්රේලියාවට ගෙවිය යුතු මුදල් කොල්ලකෑමට අමතරව, ඉන්දියාවට ගෙවීමට තිබූ මුදලක් සම්බන්ධයෙන් ද එවැනිම වංචාවකට හැකර්වරුන් උත්සාහ කර ඇති බව මුදල් හා ක්රමසම්පාදන නියෝජ්ය ඇමැති අනිල් ජයන්ත ප්රනාන්දු මහතා හෙළිදරව් කළේය. පෙරේදා (22) පැවැති මාධ්ය හමුවකදී අදහස් දැක්වූ අමාත්යවරයා, රජයේ මූල්ය ආරක්ෂාව සම්බන්ධයෙන් පැතිර යන අසත්ය තොරතුරු නිවැරදි කරමින් මෙම කරුණු අනාවරණය කළේය.
නියෝජ්ය ඇමැතිවරයාට අනුව හැකර්වරුන් විසින් මහා භාණ්ඩාගාරය සහ විදේශීය මූල්ය ආයතන අතර සිදුවන ඊමේල් (Email) පණිවිඩ හුවමාරුවට බාධා කරමින් ගිණුම් අංක වෙනස් කිරීමට උත්සාහ කර ඇත. ඉන්දියාවට අදාළ ගෙවීමේදී දත්ත වෙනස් කර ඇති බව භාණ්ඩාගාර නිලධාරීන් නියමිත වේලාවට හඳුනාගැනීම නිසා එම මුදල් කොල්ලකෑමට තිබූ අවස්ථාව වැළකී ගොස් තිබේ. කෙසේ වෙතත් ‘ඔස්ට්රේලියානු අපනයන මූල්ය ආයතනය’ (Export Finance Australia) වෙත ගෙවීමට තිබූ මුදල්, හැකර්වරුන්ගේ ගිණුම්වලට බැර කරවා ගැනීමට ඔවුන් සමත්ව ඇත්තේ සන්නිවේදන පද්ධතියේ පවතින දුර්වලතා උපයෝගී කරගනිමින් බව හෙළි විය.
විමර්ශන සහ විනය පියවර
සිද්ධිය සම්බන්ධයෙන් ශ්රී ලංකා පොලීසියේ පරිගණක අපරාධ විමර්ශන අංශය සහ SLCERT ආයතනය මේ වන විටත් දීර්ඝ පරීක්ෂණ අරඹා ඇත. නියෝජ්ය භාණ්ඩාගාර ලේකම්වරුන් දෙදෙනෙකුගෙන් සමන්විත කණ්ඩායමක් මඟින් අභ්යන්තර පරීක්ෂණ පවත්වා ඇති අතර රාජකාරි පැහැර හැරි බවට හඳුනාගත් නිලධාරීන්ට එරෙහිව මේ වන විටත් විනය ක්රියාමාර්ග ගෙන තිබේ. මුදල් අමාත්යවරයා ලෙස ජනාධිපතිවරයා මෙම විමර්ශන වේගවත් කිරීමට අවශ්ය උපදෙස් ලබා දී ඇත. අහිමි වූ මුදල් නැවත අය කරගැනීම සහ අපරාධකරුවන් අත්අඩංගුවට ගැනීම රජයේ මූලික ඉලක්කය බව පැවසූ අමාත්යවරයා, මෙවැනි සංවේදී පරීක්ෂණ පිළිබඳ තොරතුරු ප්රසිද්ධ කිරීමේදී වගකීමෙන් කටයුතු කරන ලෙස මාධ්යවලින් ඉල්ලා සිටියේය.
