නීති විරෝධී වැලි ජාවාරම මැඩලීම සහ වැලි මිල පාලනය කිරීම වෙනුවෙන් නව නීතිමය ක්රමවේදයක් හඳුන්වා දීමට රජය තීරණය කර ඇති බව සමූපකාර සංවර්ධන නියෝජ්ය අමාත්ය උපාලි සමරසිංහ මහතා පවසයි. මන්නාරම දිස්ත්රික් ලේකම් කාර්යාලයේදී පැවැති විශේෂ සාකච්ඡාවකදී අනාවරණය වූයේ මන්නාරම දිස්ත්රික්කයේ පවතින ගැටලුකාරී තත්ත්වය හේතුවෙන් දැනට නිකුත් කර ඇති සියලු වැලි කැණීම් බලපත්ර තාවකාලිකව අත්හිටුවීමට බලධාරීන් පියවර ගෙන ඇති බවයි. භූ විද්යා සමීක්ෂණ හා පතල් කාර්යාංශය සමඟ එක්ව විධිමත් මෙන්ම පරිසර හිතකාමී වැඩපිළිවෙළක් ඉදිරියේදී ස්ථාපිත කිරීමට මෙහිදී විශේෂ අවධානය යොමු කෙරිණි.
මෙම නව ක්රමවේදය යටතේ ජනතාවට සහන සැලසීම සඳහා වැලි මිල සම්බන්ධයෙන් විශේෂ එකඟතාවන් කිහිපයකට එළැඹී තිබේ. ඒ අනුව දිළිඳු පවුල් සඳහා නිවාස ඉදිකිරීමේදී වැලි කියුබ් 3ක් රුපියල් 50,000ක සහන මිලකට ලබාදීමටත් රජයේ ඉදිකිරීම් සඳහා රුපියල් 65,000ක මුදලකට ලබාදීමටත් තීරණය කර ඇත. මීට අමතරව යාපනය දිස්ත්රික්කයට වැලි ප්රවාහනය කිරීමේදී රුපියල් 90,000 සිට ලක්ෂය දක්වා වූ මිල සීමාවන් සහ අනෙකුත් ප්රදේශ සඳහා කිලෝමීටරයකට රුපියල් 350 බැගින් අමතර ගාස්තුවක් අය කිරීමට ද යෝජනා වී තිබේ.
ලබන සතියේ සිට දිස්ත්රික් ලේකම්වරයාගේ සෘජු අධීක්ෂණය යටතේ නව බලපත්ර නිකුත් කිරීමේ කටයුතු ආරම්භ කිරීමට නියමිත අතර එමඟින් ක්ෂේත්රයේ පවතින අක්රමිකතා රැසක් මඟහරවා ගැනීමට අපේක්ෂා කෙරේ. ජාතික ජන බලවේගයේ වන්නි දිස්ත්රික් පාර්ලිමේන්තු මන්ත්රී එම්. ජගදීස්වරන් සහ මන්නාරම දිස්ත්රික් ලේකම් කේ. කනගේෂ්වරන් ඇතුළු රාජ්ය නිලධාරීන් රැසක් සහභාගී වූ මෙම සාකච්ඡාවේදී අවධාරණය කෙරුණේ ජනතාවට සාධාරණ මිලකට වැලි ලබාදීම රජයේ ප්රධාන අරමුණක් බවයි.
