2023 ඔක්තෝබර් 07 වැනිදා ඊශ්රායලයට එල්ල වූ ප්රහාරයට සම්බන්ධ වූ හමාස් සටන්කාමීන් සිය ගණනක් විමර්ශනය කිරීම සඳහා විශේෂ හමුදා අධිකරණයක් පිහිටුවීමට අදාළ පනත ඊශ්රායල පාර්ලිමේන්තුව (Knesset) විසින් සම්මත කර තිබේ. ඊශ්රායල දේශපාලන ඉතිහාසයේ දක්නට ලැබෙන දුර්ලභ එකමුතුවක් පෙන්නුම් කරමින් මන්ත්රීවරුන් 120ක් අතරින් 93 දෙනෙකුගේ අතිමහත් බහුතර ඡන්දයෙන් මෙම පනත සම්මත විය. ප්රහාරය අතරතුර ඊශ්රායලය තුළදී අත්අඩංගුවට ගත් හමාස් “නුක්බා” (Nukhba) බලකායේ සටන්කාමීන් 200ත් 300ත් අතර පිරිසක් මේ වන විට රඳවාගෙන සිටින අතර ඔවුන්ට මෙතෙක් නිල වශයෙන් චෝදනා ගොනු කර නොතිබුණි.
ජෙරුසලම කේන්ද්ර කරගනිමින් විනිසුරුවරුන් තිදෙනෙකුගෙන් යුත් මණ්ඩලයක් මගින් මෙම විශේෂ හමුදා අධිකරණය මෙහෙයවනු ලබන අතර ඔක්තෝබර් 7 ප්රහාරයට සෘජුව සම්බන්ධ වූවන් මෙන්ම ප්රාණ ඇපකරුවන්ට වධහිංසා පැමිණවූවන් ද මින් විමර්ශනයට ලක් කෙරේ. මෙම නව නීතිය යටතේ මරණ දඬුවම නියම කිරීමට අවස්ථාව සලසා දී ඇති නමුත් එය අනිවාර්ය කර නොමැති අතර නීති විශේෂඥයන් පෙන්වා දෙන්නේ සාධාරණ නඩු විභාගයක් පැවැත්වීම පිළිබඳ මෙහිදී බරපතල ගැටලු මතු විය හැකි බවයි. 2023 ඔක්තෝබර් 7 ප්රහාරයෙන් පුද්ගලයන් 1,200ක් පමණ මියගිය අතර ඊට ප්රතිචාර ලෙස ඊශ්රායලය ගාසා තීරයට එල්ල කළ ප්රහාරවලින් මේ වන විට පලස්තීනුවන් 72,000කට අධික පිරිසක් මියගොස් තිබේ. හමාස් සංවිධානය මෙම නව නීතිය දැඩි ලෙස හෙළා දකිමින් ප්රකාශ කර ඇත්තේ මෙය ජාත්යන්තර නීති උල්ලංඝනය කිරීමක් බවයි.
