ප්රජාතන්ත්රවාදී කොංගෝ සමූහාණ්ඩුවේ (DR Congo) නැගෙනහිර ඉටුරි (Ituri) පළාතේ නව එබෝලා වෛරස් ව්යාප්තියක් පවතින බව අප්රිකානු රෝග පාලන හා වැළැක්වීමේ මධ්යස්ථානය (Africa CDC) නිවේදනය කර තිබේ.
අප්රිකානු රෝග පාලන මධ්යස්ථානයට අනුව මේ වන විට රෝගීන් 246ක් සහ මරණ 65ක් වාර්තා වී ඇත. මෙලෙස රෝගය වැඩි වශයෙන් වාර්තා වී ඇත්තේ මොන්ග්වාලු (Mongwalu) සහ රවම්පාරා (Rwampara) යන රන් ආකර ආශ්රිත නගරවලිනි. වාර්තා වී ඇති මරණ 65න් 4ක්ම රසායනාගාර පරීක්ෂණ මගින් තහවුරු කරන ලද රෝගීන් බව ද එම මධ්යස්ථානය සඳහන් කරයි. මීට අමතරව ඉටුරි පළාත් අගනුවර වන බුනියා (Bunia) නගරයෙන් ද සැකකටයුතු රෝගීන් වාර්තා වී ඇති අතර ඒවා තහවුරු කර ගැනීම සඳහා රසායනාගාර පරීක්ෂණ සිදු කෙරෙමින් පවතී.
රවම්පාරා සහ බුනියා වැනි නාගරික ප්රදේශවල මෙන්ම මොන්ග්වාලු හි පවතින පතල් කැණීම් කටයුතු හේතුවෙන් රෝගය තවදුරටත් ව්යාප්ත වීමේ ඉහළ අවදානමක් පවතින බව සෞඛ්ය අංශ පෙන්වා දෙයි. එලෙසම බලපෑමට ලක්වූ ප්රදේශ සහ අසල්වැසි රටවල් අතර පවතින ජන සංක්රමණ හේතුවෙන් කලාපීය සම්බන්ධීකරණය අත්යවශ්ය වී තිබේ. මේ සම්බන්ධයෙන් සාකච්ඡා කිරීම සඳහා කොංගෝ රාජ්යය, උගන්ඩාව, දකුණු සුඩානය සහ ජාත්යන්තර හවුල්කරුවන් සමඟ විශේෂ රැස්වීමක් කැඳවීමට අප්රිකානු රෝග පාලන මධ්යස්ථානය පියවර ගෙන ඇත.
එබෝලා රෝගය සිරුරේ තරල සමඟ සෘජුව ස්පර්ශ වීමෙන් හෝ තුවාල වූ සම හරහා ව්යාප්ත වන අතර එය දැඩි රුධිර වහනයක් සහ ඉන්ද්රිය අකර්මණ්ය වීමට හේතු වේ. උණ, මාංශ පේශි වේදනාව, තෙහෙට්ටුව, හිසරදය සහ උගුරේ අමාරුව මෙහි මුල් රෝග ලක්ෂණ වන අතර පසුව වමනය, පාචනය සහ රුධිර වහනය වැනි තත්ත්වයන් ඇති විය හැකිය. ලෝක සෞඛ්ය සංවිධානයට අනුව මෙහි සාමාන්ය මරණ අනුපාතය 50%ක් පමණ වේ. මෙය කොංගෝ රාජ්යයෙන් වාර්තා වන 17 වන එබෝලා ව්යාප්තියයි.
