චීන ජනාධිපති ෂී ජින්පින්ග් එරට රඳවාගෙන සිටින ක්රිස්තියානි දේවගැතිවරයෙකු නිදහස් කිරීම පිළිබඳව දැඩි ලෙස අවධානය යොමු කරනු ඇතැයි තමන් විශ්වාස කරන නමුත්, සිරගත කර සිටින මාධ්ය දැවැන්තයෙකු වන ජිමී ලායිගේ (Jimmy Lai) සිද්ධිය “අසීරු එකක්” වනු ඇති බව අමෙරිකානු ජනාධිපති ඩොනල්ඩ් ට්රම්ප් ප්රකාශ කර සිටියි.
චීන සංචාරය නිම කර යළි අමෙරිකාව බලා පැමිණෙන අතරතුර එයාර් ෆෝස් වන් (Air Force One) යානයේ සිට මාධ්යවේදීන් අමතමින් ට්රම්ප් මේ බව සඳහන් කළේය. දේවගැතිවරයා සම්බන්ධයෙන් ෂී ජින්පින්ග් සාධනීය අවධානයක් යොමු කරන බව පැවසුවද, ජිමී ලායිගේ තත්ත්වය ඊට වඩා වෙනස් වනු ඇති බව චීන ජනාධිපතිවරයා තමන්ට පැවසූ බව ට්රම්ප් මෙහිදී අනාවරණය කළේය.
දැන් වසා දමා ඇති ‘Apple Daily’ පුවත්පතේ නිර්මාතෘවරයා වන ජිමී ලායිට විදේශීය බලවේග සමඟ කුමන්ත්රණය කිරීම ඇතුළු චෝදනා කිහිපයක් මත පසුගිය පෙබරවාරි මාසයේදී වසර 20ක සිරදඬුවමක් නියම විය. හොංකොං හි ජාතික ආරක්ෂක නීති යටතේ සිදුකළ මෙම ක්රියාමාර්ගය ජාත්යන්තර මානව හිමිකම් සංවිධානවල දැඩි විවේචනයට ලක්ව තිබේ.
මේ අතර ‘Zion Church’ හි නිර්මාතෘ දේවගැති ජින් මින්ග්රි (Jin Mingri) ඇතුළු පිරිසක් පසුගිය නොවැම්බර් මාසයේදී අත්අඩංගුවට ගන්නා ලදී. මෙය 2018 වසරෙන් පසු චීන ක්රිස්තියානි බැතිමතුන්ට එරෙහිව එරට බලධාරීන් සිදුකළ විශාලතම මර්දනය ලෙස සැලකේ. අනවසරයෙන් අන්තර්ජාලය හරහා ආගමික දේශනා පැවැත්වීම සහ “විදේශීය කුමන්ත්රණ” තහනම් කරමින් චීනයේ ආගමික නියාමන ආයතනය පැනවූ නව නීති යටතේ මෙම අත්අඩංගුවට ගැනීම් සිදුව ඇත.
