නැගෙනහිර පළාතේ ජනතාව මූල්ය සාක්ෂරතාව අඩුකම හේතුවෙන් නිතර විවිධ වංචනික ක්රියාවන්ට ගොදුරු වීම කෙරෙහි අවධානය යොමු කරමින්, ප්රජාව සහ පොලිස් නිලධාරීන් දැනුවත් කිරීමේ විශේෂ වැඩසටහනක් ක්රියාත්මක කරන ලෙස නියෝජ්ය පොලිස්පති සුජිත් වෙදමුල්ල මහතා ශ්රී ලංකා මහ බැංකු අධිපති ආචාර්ය නන්දලාල් වීරසිංහ මහතාගෙන් ඉල්ලීමක් කර තිබේ. ත්රිකුණාමලයේදී පැවති නැගෙනහිර පළාතේ රාජ්ය ආයතන ප්රධානීන් සහ ව්යවසායකයන්ගේ හමුවකදී ඔහු මේ බව ප්රකාශ කළේය.
අම්පාර දිස්ත්රික්කය ඇතුළු නැගෙනහිර පළාතේ පොලිස් වසම් තුළ වංචා සහ සාපරාධී සාවද්ය විශ්වාසය කඩ කිරීම් වැනි පැමිණිලි දිවයිනේ අනෙකුත් ප්රදේශවලට සාපේක්ෂව ඉතා බහුල බව නියෝජ්ය පොලිස්පතිවරයා නිරීක්ෂණය කර ඇත. සිංහල බහුතරයක් වෙසෙන ප්රදේශවල ජනතාව පිරමීඩ ජාවාරම්, නීත්යනුකූල නොවන මූල්ය ආයතනවල තැන්පතු සහ නීති විරෝධී ලෙස විදෙස්ගත වීමේ වංචාවන්ට හසුවන අතර, මුස්ලිම් ප්රජාව ව්යාපාරික කටයුතු සඳහා මුදල් ලබාදීම් සහ භාණ්ඩ ලබාගැනීමේදී සිදුකරන වංචාවන්ට බහුලව ගොදුරු වේ.
මෙම වංචාවන්ට හසුවන්නන් අතර රජයේ සේවකයන්, උගතුන්, බුද්ධිමතුන් සහ ඇතැම් පොලිස් නිලධාරීන් පවා සිටීම කනගාටුදායක තත්ත්වයක් බව වෙදමුල්ල මහතා පෙන්වා දුන්නේය. සමාගම් මැදිරියේ ලියාපදිංචි වූ පමණින් ඕනෑම මූල්ය කටයුත්තක් සිදුකිරීමට අදාළ ආයතනවලට අවසර නොමැති බව ජනතාව තේරුම් ගත යුතුය.
ඕනෑම මූල්ය ආයෝජනයක් හෝ ගනුදෙනුවක් සිදුකිරීමේදී හුදෙක් විශ්වාසය මත පමණක් පදනම් නොවී, එම ආයතනවල නීත්යනුකූල භාවය සහ බලපත්ර පරීක්ෂා කර බැලීමේ වැදගත්කම පිළිබඳව ජනතාව නිරන්තරයෙන් දැනුවත් විය යුතු බවත්, පොලීසිය සහ මහ බැංකුව ඒකාබද්ධව මෙවැනි දැනුවත් කිරීමේ වැඩසටහන් ක්රියාත්මක කිරීම කාලෝචිත බවත් ඔහු අවධාරණය කළේය.
