භාණ්ඩ ආනයනය කරන මුවාවෙන් 2023 වසරේ සිට මේ දක්වා කාලය තුළ නීතිවිරෝධී ලෙස අමෙරිකානු ඩොලර් මිලියන 700කට වැඩි (රුපියල් කෝටි විසි එක්දහසකට අධික) මුදලක් විදේශ රටවලට යැවීමේ මහා පරිමාණ ජාවාරමක නිරත වූ ප්‍රධාන සැකකරුවාව මූල්‍ය අපරාධ විමර්ශන කොට්ඨාසය විසින් අත්අඩංගුවට ගෙන තිබෙනවා. මහජන ආරක්ෂක අමාත්‍ය ආනන්ද විජේපාල මහතා මීට පෙර පාර්ලිමේන්තුවේදී කළ අනාවරණයකට අනුව සිදුකළ විමර්ශනවලදී හෙළි වී ඇත්තේ, කොළඹ කොටුව ප්‍රදේශයේ පවත්වාගෙන යන ‘A.Y ඉන්වෙස්ට්මන්ට්’ නම් ආයතනයේ අධ්‍යක්ෂවරයා ලෙස පෙනී සිටිමින් ජෙෆ්රි මොහොමඩ් නමැති පුද්ගලයා මෙම ජාවාරම මෙහෙයවා ඇති බවයි. මොහු හරහා කොළඹ ප්‍රධාන පෙළේ ආනයනකරුවන් කූට ලෙස ඩොලර් පිටරට යවා භාණ්ඩ ගෙන්වීම නිසා රජයට විශාල තීරුබදු ආදායමක් ද අහිමි වී තිබෙනවා.
මෑතකදී අත්අඩංගුවට ගත් මත්ද්‍රව්‍ය ජාවාරම්කරුවෙකුගෙන් කළ ප්‍රශ්න කිරීම්වලදී හෙළි වී ඇත්තේ, මෙරට ප්‍රබල කුඩු ජාවාරම්කරුවන් ද තමන් උපයන මුදල් විදේශගත කිරීමට මෙම පුද්ගලයා සේවය ලබාගෙන ඇති බවයි. ඒ අනුව, ඊයේ (19) මීගමුවේ පිහිටි නිවාස සංකීර්ණයක සැඟවී සිටියදී සැකකරුවාව අත්අඩංගුවට ගත් අතර, අද (20) කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමෙන් පසු ඔහුව දින 7ක් රඳවාගෙන ප්‍රශ්න කිරීමට පොලිසිය අවසර ලබාගත්තා. සාක්ෂරතාව අඩු පුද්ගලයන් 36 දෙනෙකුගේ නමින් බැංකු ගිණුම් අරඹා, ඇතැම් බැංකු නිලධාරීන්ගේ ද සහාය ඇතිව මෙම ජාවාරම කර ඇති අතර, එක් ඩොලරයකින් රුපියල් 2ක කොමිස් මුදලක් සැකකරු උපයා තිබෙනවා. ජාවාරම් මුදලින් ඔහු මිලදී ගත් රුපියල් කෝටි 20කට අධික වටිනාකමකින් යුත් අධි සුඛෝපභෝගී මෝටර් රථ කිහිපයක් ද පොලිස් භාරයට ගෙන ඇති අතර, මොහු සමඟ ගනුදෙනු කළ ව්‍යාපාරිකයන් පිළිබඳව ද විශේෂ විමර්ශනයක් ආරම්භ කර තිබෙනවා.
