ලෝක වෙළෙඳපොළේ පවතින සාමාන්ය මිලට වඩා වැඩි මිලක් ගෙවා ඉන්ධන මිලදී ගැනීම හේතුවෙන් රටේ විදේශ විනිමය සංචිතවලට අගතිගාමී බලපෑමක් සිදුව ඇති බව විපක්ෂ නායක සජිත් ප්රේමදාස මහතා පවසයි. ඔහු මේ බව කියා සිටියේ කොළඹ බණ්ඩාරනායක ජාත්යන්තර සම්මන්ත්රණ ශාලාවේ පැවැති ‘Colombo EV Motor Show’ ප්රදර්ශනය අමතමිනි.
විපක්ෂ නායකවරයා පෙන්වා දුන් ආකාරයට, ලෝක වෙළෙඳපොළේ තෙල් මිල ඉහළ යන විට මෙරට මිල ඉහළ නංවන නමුත්, මිල පහළ යන විට එම වාසිය ජනතාවට නොලැබීම බරපතල අසාධාරණයක් බව ඔහු අවධාරණය කළේය.
විදුලි වාහන සම්බන්ධයෙන් අදහස් දැක්වූ ඒ මහතා පැවසුවේ මෙරටට විදුලි වාහන ආනයනය කිරීම පමණක් ප්රමාණවත් නොවන බවත්, රණසිංහ ප්රේමදාස ජනාධිපතිවරයා අනුගමනය කළ ක්රමවේදය ඔස්සේ විශේෂ දිරිගැන්වීම් සහ පහසුකම් ලබා දෙමින් විදුලි වාහන නිෂ්පාදන කර්මාන්තශාලා පද්ධතියක් මෙරට ස්ථාපිත කළ යුතු බවත්ය. එමගින් අපනයන ක්ෂේත්රය වර්ධනය වීම, තරුණයන්ට රැකියා අවස්ථා උදාවීම සහ තාක්ෂණික හුවමාරුවක් සිදුවීම වැනි වාසි රැසක් රටට අත් වන බව ඔහු පෙන්වා දුන්නේය.
තවද විදුලි වාහන භාවිතය ඉහළ පන්තියට පමණක් සීමා නොවී පොදු ජනතාවටත් දරාගත හැකි මිලකට ඒවා ලබා ගැනීමට වැඩපිළිවෙළක් සකස් කිරීමේ වැදගත්කම ඔහු අවධාරණය කළේය. මැදපෙරදිග කලාපයේ ඇතිවන යුදමය තත්ත්වයන් හේතුවෙන් මෙරට බලශක්ති ආරක්ෂිතභාවයට ඇති අවදානම අවම කර ගැනීම සඳහා පුනර්ජනනීය සහ විදුලි ප්රවාහන ක්ෂේත්රය ශක්තිමත් කිරීම අත්යවශ්ය පියවරක් බවද සජිත් ප්රේමදාස මහතා පවසා සිටියේය.
