දශක හතකට අධික කාලයක් පුරා මෙරට දේශපාලන අධිකාරියේ වක්ර අනුග්රහය සහ රැකවරණය මධ්යයේ පෝෂණය වූ පාතාලය සහ මත්ද්රව්ය ජාලය මුලිනුපුටා දැමීම සඳහා වත්මන් රජය මේ වන විට දැවැන්ත මෙහෙයුමක් දියත් කර තිබේ. ජාතික ජන බලවේගයේ පාර්ලිමේන්තු මන්ත්රී මුතූ රත්වත්තේ මහත්මිය පෙන්වා දෙන පරිදි, මත්ද්රව්ය, හොරකම සහ පාතාලය යනු එකිනෙක බැඳුණු විනාශකාරී දාමයක් වන අතර, අතීතයේ දේශපාලන නායකත්වයන් විසින්ම මෙම ජාවාරම්කරුවන් දේශපාලනයට ආදේශ කරගැනීම සහ ඔවුන්ට නීතියෙන් බාධාවකින් තොරව ක්රියාත්මක වීමට ඉඩකඩ සලසා දීම හේතුවෙන් මෙම ව්යසනය සමාජගත වී තිබේ.
මෙම අභියෝගාත්මක පසුබිම තුළ වත්මන් රජය කෙටි කාලයක් තුළ රටේ නීතිය හා සාමය තහවුරු කිරීමට ගෙන ඇති ක්රියාමාර්ග අතිශය තීරණාත්මක ය. පොලිස් ස්ථානාධිපතිවරුන් පත් කිරීමේදී සිදු වූ දේශපාලන මැදිහත්වීම් අවසන් කරමින්, දූෂිත දේශපාලන සංස්කෘතියක් තුළ මුල් බැසගත් ජාවාරම්කරුවන් නීතියේ රැහැනට හසු කර ගැනීම සඳහා ජනාධිපතිවරයාගේ ප්රධානත්වයෙන් මත්ද්රව්ය විරෝධී ජාතික ව්යාපාරයක් ගම් මට්ටමින් දියත් කර ඇත. දෙහිඅත්තකණ්ඩිය වැනි ප්රදේශවල මෑතකදී සිදු වූ අත්අඩංගුවට ගැනීම්වලින් පැහැදිලි වන්නේ නීතිය ක්රියාත්මක කිරීමේ ස්වාධීනත්වය යළි ස්ථාපිත වී ඇති බවයි.
පවතින මත්ද්රව්ය ව්යසනයෙන් තරුණ පරපුර සහ පාසල් දරුවන් මුදාගෙන ඔවුන් සමාජගත කිරීම සඳහා පුනරුත්ථාපන වැඩසටහන් ද ශක්තිමත් කෙරෙමින් පවතී. වසර ගණනාවක් පුරා පෝෂණය වූ මෙම දූෂිත පද්ධතිය වසර එකහමාරක් වැනි කෙටි කාලයකදී මුලිනුපුටා දැමීම දැවැන්ත අභියෝගයක් වුවද, සමස්ත ප්රජාවගේ දායකත්වය සහ රජයේ නොසැලෙන අධිෂ්ඨානය මත මෙම විනාශකාරී ජාලය සහමුලින්ම අතුගා දැමීම අරමුණ වී ඇත. රටේ අනාගතය සුරක්ෂිත කිරීම උදෙසා ගනු ලබන මෙම නීතිමය සහ සාමාජීය පියවර ඉදිරියේදී වඩාත් තීව්ර වනු ඇති බව විශ්වාස කෙරේ.
