පසුගිය කාලවකවානුවේ පැවති දේශපාලන සංස්කෘතිය හුදෙක් රටේ සංවර්ධනය කෙරෙහි නොව, දේශපාලකයන්ගේ පෞද්ගලික ආර්ථික වාසි හා සාක්කු පිරවීම වෙනුවෙන් පමණක් ක්රියාත්මක වූවක් බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා පවසයි.
අමාත්යවරයා මේ බව සඳහන් කළේ, 2030 වසර වන විට ශ්රී ලංකාවේ වාර්ෂික තේ නිෂ්පාදනය කිලෝ ග්රෑම් මිලියන 400 දක්වාත්, තේ අපනයන ආදායම අමෙරිකානු ඩොලර් බිලියන 2.5 දක්වාත් ඉහළ නැංවීමේ ජාතික ඉලක්කය සාක්ෂාත් කර ගැනීමේ අරමුණින් ක්රියාත්මක කෙරෙන “Ceylon Tea Village” (සිලෝන් ටී විලේජ්) ජාතික වැඩසටහනේ ගම්පොළ දිස්ත්රික් සමාරම්භක අවස්ථාවට එක්වෙමිනි.
වැවිලි සහ ප්රජා යටිතල පහසුකම් අමාත්යාංශය විසින් දියත් කර ඇති මෙම වැඩසටහන යටතේ දිවයින පුරා තේ ගම්මාන 500ක් ස්ථාපිත කිරීමට සැලසුම් කර ඇති අතර, එහි පළමු අදියර යටතේ තේ පරීක්ෂක කොට්ඨාස 144ක් ආවරණය වන පරිදි තේ ගම්මාන 144ක් මේ වන විට ආරම්භ කර තිබේ.
කුඩා තේවතු අංශය නවීකරණය කිරීම, ගොවි ජනතාවගේ ජීවන තත්ත්වය උසස් කිරීම සහ තේ කර්මාන්තය තිරසර සංවර්ධනයක් කරා යොමු කිරීම මෙම වැඩසටහනේ මූලික අරමුණ වේ. මෙම වැඩසටහන හරහා කුඩා තේවතු ගොවීන්ගේ දලු අස්වැන්න හා ඵලදායීතාව ඉහළ නැංවීම, තේ කර්මාන්තය සංචාරක ක්ෂේත්රය සමඟ ඒකාබද්ධ කිරීම, නවීන වගා තාක්ෂණ හඳුන්වා දීම සහ යටිතල පහසුකම් සංවර්ධනය කිරීම සිදු කෙරේ. එමෙන්ම ගොවීන් සඳහා විශේෂ රක්ෂණාවරණයක්, විශ්රාම වැටුප් ක්රමයක් සහ සහනදායී ණය පහසුකම් ලබා දීම ද මෙම සමෝධානික සංවර්ධන පැකේජයට ඇතුළත් වේ.
මෙහිදී අදහස් දැක්වූ අමාත්ය කේ.ඩී. ලාල්කාන්ත මහතා අවධාරණය කළේ, රජයේ සහ නිලධාරීන්ගේ මැදිහත්වීමට අමතරව ජනතාවගේ ද සක්රිය සහභාගීත්වය මෙම වැඩසටහනේ සාර්ථකත්වයට තීරණාත්මක වන බවයි.
මීට කලින් දේශපාලනය තිබුණේ හරිහම්බ කිරීමේ දිශාවක බවත්, ඕනෑම ව්යාපෘතියකින් කීයක් හෝ තමන්ගේ සාක්කුවේ දමා ගැනීමට දේශපාලකයන් උත්සාහ කළ බවත් අමාත්යවරයා සිහිපත් කළේය. අද අපි ග්රාමීය දුප්පත්කම නැති කරලා පොහොසත්කම කරා යන ඉලක්කයක් හඹා යන බවත්, ඒ සඳහා දේශපාලකයන්ගේ සහ රාජ්ය සේවයේ සක්රිය මැදිහත්වීම මෙන්ම තමන්ගේ ඉඩම දියුණු කර ගැනීමට ගොවි මහත්වරුන් තුළ ඇති උනන්දුව ද අත්යවශ්ය බව ඔහු පැවසීය. ජනතාව, රජය සහ රාජ්ය සේවය යන පාර්ශ්ව තුනම එකතුවී මෙම අභියෝගය ජයගත යුතු බවද අමාත්යවරයා වැඩිදුරටත් අවධාරණය කළේය.
