හොරණ – මොරගහහේන මාර්ගයේ කනන්විල වංගු ප්රදේශයේදී අද (19) අලුයම සිදු වූ රිය අනතුරකින් තරුණයන් දෙදෙනෙකු ජීවිතක්ෂයට පත්ව තිබේ. හොරණ දෙස සිට ධාවනය වූ යතුරුපැදියක් ප්රතිවිරුද්ධ දිශාවෙන් පැමිණි වැලි ප්රවාහනය කළ ටිපර් රථයක ගැටීමෙන් මෙම අනතුර සිදුව ඇති බව හොරණ මූලස්ථාන පොලීසිය ප්රකාශ කරයි. අනතුරින් බරපතළ තුවාල ලැබූ තරුණයන් දෙදෙනා හොරණ දිස්ත්රික් මහ රෝහලට ඇතුළත් කිරීමෙන් අනතුරුව මියගොස් ඇත.
මෙසේ මියගොස් ඇත්තේ වයස අවුරුදු 25ක් වන දිල්ෂාන් මදුසර සෙනෙවිරත්න සහ වයස අවුරුදු 17ක් වන උදීෂ් සිත්මින නැමති පන්නිපිටිය සහ කිරිවත්තුඩුව ප්රදේශවල පදිංචිකරුවන් බව පොලීසිය හඳුනාගෙන තිබේ. මියගිය තරුණයන් දෙදෙනා හොරණ ප්රදේශයේ පැවති සංගීත ප්රසංගයක් නරඹා නැවත නිවෙස් බලා යමින් සිටියදී මෙම අනතුරට මුහුණ පා ඇත. පොලිස් මූලික විමර්ශනවලට අනුව, අධික වේගයෙන් ධාවනය වූ යතුරුපැදිය කනන්විල වංගුව ගැනීමේදී රියදුරුට වේගය පාලනය කරගත නොහැකිව දකුණු මංතීරුවට ඇදී ගොස් ටිපර් රථයේ ගැටී ඇති බවට සැක කෙරේ.
අනතුරට සම්බන්ධ ටිපර් රථයේ රියදුරු හොරණ මූලස්ථාන පොලීසිය විසින් අත්අඩංගුවට ගෙන ඇති අතර, ඔහු අද (19) හොරණ මහේස්ත්රාත් අධිකරණයට ඉදිරිපත් කිරීමට නියමිතව ඇත. සති අන්ත සහ රාත්රී කාලයන්හිදී සිදුවන මාරක රිය අනතුරු ඉහළ යාම කෙරෙහි අධික වේගය සහ නොසැලකිලිමත් ධාවනය සෘජුවම බලපාන බව පෙන්වා දෙන පොලීසිය, රියදුරන් වඩාත් වගකීමෙන් යුතුව රීති අනුගමනය කළ යුතු බව අවධාරණය කරයි. සිද්ධිය සම්බන්ධයෙන් හොරණ මූලස්ථාන පොලීසියේ රථවාහන අංශය මඟින් ඉදිරි විමර්ශන කටයුතු ක්රියාත්මකය.
