පේරාදෙණිය විශ්වවිද්යාලයේ ආරක්ෂක අධ්යක්ෂවරයා ලෙස පත්කර තිබෙන එච්.එම්.එච්.ඒ. කපිලරත්න නමැති විශ්රාමික මේජර්වරයා, යුධ හමුදා වෛද්ය මණ්ඩලයක් මගින් වෛද්ය හේතු මත (එක් ඇසක ස්ථීර ආබාධිත තත්ත්වය හේතුවෙන්) සේවයට නුසුදුසු බව තීරණය කර විශ්රාම ගැන්වූ අයෙකු බව ඊයේ (05) පැවැති කෝප් කමිටු රැස්වීමේදී හෙළිදරව් වී තිබේ.
පේරාදෙණිය විශ්වවිද්යාලයේ ප්රධාන ආරක්ෂක නිලධාරීවරයා 2024 වර්ෂයේදී විමර්ශන කටයුත්තකට අදාළව වැඩ තහනමට ලක්කිරීම හේතුවෙන්, අදාළ තනතුරේ වැඩ ආවරණය කිරීම සඳහා මෙම පුද්ගලයා කොන්ත්රාත් පදනම මත මුලින් බඳවාගෙන ඇත.
කෙසේ වෙතත්, ප්රධාන ආරක්ෂක නිලධාරීවරයා සිය වැඩ තහනමට එරෙහිව අභියාචනාධිකරණයේ ගොනු කළ රිට් පෙත්සමකට අනුව, ඔහුව නැවත සේවයේ පිහිටුවන ලෙස 2025 සැප්තැම්බර් 12 වන දින අතුරු තහනම් නියෝගයක් නිකුත් කෙරිණි. එම අතුරු තහනම් නියෝගය නිකුත් වීමත් සමග විශ්වවිද්යාල බලධාරීන් එතෙක් විශ්වවිද්යාල පද්ධතියේ නොමැති “අධ්යක්ෂ (ආරක්ෂක)” නමැති නව තනතුරක් ඇති කර, කොන්ත්රාත් පදනම මත සිටි කපිලරත්න නමැත්තා එකී තනතුරට උසස් කිරීමට කටයුතු කර තිබේ. මෙම තනතුර ඇති කිරීම සහ උසස් කිරීම එකම පාලක සභා සංදේශයකින් එකම දිනයකදී සිදුකර තිබීමෙන්, අදාළ තනතුර මෙම පුද්ගලයා වෙනුවෙන්ම නිර්මාණය කරන ලද්දක් බව පෙනී යයි.
විශ්වවිද්යාල පද්ධතිය සඳහා නව තනතුරු ඇති කිරීම සහ නිල නාමයන් වෙනස් කිරීම විශ්වවිද්යාල ප්රතිපාදන කොමිෂන් සභාවේ බලතලවලට අයත් වන අතර, ඊට අමතරව කළමනාකරණ සේවා දෙපාර්තමේන්තුවේ සහ වැටුප් හා සංඛ්යා ලේඛන කොමිෂන් සභාවේ අනුමැතියද අනිවාර්ය වේ. එහෙත් මෙම අධ්යක්ෂ (ආරක්ෂක) තනතුර සඳහා එකී අනුමැතීන් කිසිවක් ලබාගෙන නොමැති බව කෝප් කමිටුවේදී තහවුරු වී ඇත.
අනුමත බඳවා ගැනීමේ පටිපාටියකින් හෝ වැටුප් ව්යූහයකින් තොරව බඳවා ගත් මෙම පුද්ගලයාට රුපියල් ලක්ෂ දෙකකට ආසන්න මාසික වැටුපක් ගෙවා ඇති අතර, සමස්තයක් ලෙස ලක්ෂ 10ක පමණ මහජන මුදලක් ගෙවා තිබේ. ආයතන සංග්රහයට අනුව වැඩ තහනමකට ලක්වූ නිලධාරියෙකුගේ වැඩ බලීමට බැහැරින් කොන්ත්රාත් පදනමට පුද්ගලයන් බඳවා ගැනීමට කිසිදු ප්රතිපාදනයක් නොමැති පසුබිමක මෙම පත්වීම ලබාදීම දැඩි අක්රමිකතාවකි.
එසේම, වෛද්ය හේතු මත සේවයට නුසුදුසු යැයි තීරණය කළ පුද්ගලයෙකු නැවත රාජ්ය සේවයේ යෝග්යතාවයක් අවශ්ය තනතුරකට පත්කිරීම මෙන්ම, මෙම පත්වීම ලබන අවස්ථාව වන විටත් ඔහු ශ්රී ලංකා යුධ හමුදාවෙන් පූර්ණ වැටුප් ලබමින් සිටීම නිසා රාජ්ය සේවයේ තනතුරු දෙකකින් පූර්ණ වැටුප් ලබාගැනීමේ වංචාවක් සිදුව ඇති බවත්, ඒ පිළිබඳව දැනටමත් අල්ලස් කොමිසමට පැමිණිල්ලක් ඉදිරිපත් කර ඇති බවත් ආරංචි මාර්ග පවසයි.
