ලෝක සංචාරක දිනය නිමිත්තෙන් විශේෂ සැමරුම් වැඩසටහනක් සැප්තැම්බර් 27 වැනිදා මහනුවර ශ්‍රී දළදා මාළිගාව කේන්ද්‍ර කරගනිමින් පැවැත්විණි. ලොව විවිධ රටවලින් පැමිණි විදෙස් සංචාරකයන් පිරිසක්ද මෙම අවස්ථාවට එක්වූ බව ශ්‍රී දළදා මාළිගාවේ නිල තොරතුරු සඳහන් කරයි.
ශ්‍රී දළදා මාළිගාව සහ ඓතිහාසික මහනුවර පිළිබඳ විශේෂ මාර්ගෝපදේශන, සංස්කෘතික අංග සහ උඩරට සංස්කෘතිය හඳුන්වාදීමේ වැඩසටහන් මෙහිදී සංවිධානය කර තිබේ. එමෙන්ම විදෙස් සංචාරකයන්ට ශ්‍රී ලංකාවේ සාම්ප්‍රදායික රසකැවිලි සහ පාන වර්ග රසවිඳීමට මෙන්ම මෙරට තේ කර්මාන්තය පිළිබඳ අත්දැකීමක් ලබාගැනීමටද අවස්ථාව සලසා තිබුණි.
මෙම වැඩසටහන ශ්‍රී ලංකා සංචාරක ප්‍රවර්ධන කාර්යාංශය ඇතුළු පාර්ශ්වයන්ගේ සහයෝගයෙන් සංවිධානය කර තිබූ අතර, ශ්‍රී ලංකාවේ සංස්කෘතික උරුමය සහ සංචාරක ආකර්ෂණීය ස්ථාන විදෙස් සංචාරකයන් වෙත හඳුන්වාදීම එහි ප්‍රධාන අරමුණක් වී තිබේ.
