යටත් විජිත සමයේදී මෙරටින් රැගෙන ගිය සංස්කෘතික උරුමයන් සහ කලාකෘති නැවත මෙරටට ගෙන්වා ගැනීම සඳහා ප්රතිපත්තිමය සහ සාක්ෂි මත පදනම් වූ රාජ්ය තාන්ත්රික ප්රවේශයක අවශ්යතාව වැඩබලන විදේශ අමාත්ය අරුණ හේමචන්ද්ර මහතා අවධාරණය කරයි. ඔහු මේ බව කියා සිටියේ පසුගිය මැයි 13 වනදා කොළඹදී පැවති “Whose Law?” පර්යේෂණ සමුළුවේ සමාරම්භක සැසිය අමතමිනි.
නීති විශේෂඥයින්, ඉතිහාසඥයින්, පර්යේෂකයින් සහ ප්රතිපත්ති සම්පාදකයින්ගේ සහභාගීත්වයෙන් පැවති මෙම සමුළුවේදී අමාත්යවරයා පෙන්වා දුන්නේ, යටත් විජිත යුගයේ අහිමි වූ උරුමයන් නැවත ලබාගැනීම හුදෙක් දේශපාලනික හෝ රාජ්ය තාන්ත්රික කටයුත්තක් පමණක් නොව නීතිය, ඉතිහාසය, සංස්කෘතිය සහ යුක්තිය යන සියල්ල එකිනෙක මුණගැසෙන සංකීර්ණ ක්රියාවලියක් බවයි. එම කලාකෘති හුදෙක් කෞතුකාගාර භාණ්ඩ පමණක් නොව, ජාතියක අනන්යතාවය සහ ඓතිහාසික මතකය නිරූපණය කරන ජීවමාන සංකේත බව ද ඔහු මෙහිදී පවසා සිටියේය.
මෙම අරමුණ ජයගැනීම සඳහා පර්යේෂණ ශක්තිමත් කිරීම, නීතිමය පැහැදිලිතාව, ආයතනික සම්බන්ධීකරණය සහ ජාත්යන්තර සහයෝගීතාව වර්ධනය කර ගැනීමේ වැදගත්කම වැඩබලන අමාත්යවරයා වැඩිදුරටත් අවධාරණය කළේය. මෙරට සංස්කෘතික උරුමයන් සුරැකීම සහ ඒවා නැවත අත්පත් කර ගැනීම උදෙසා මහජන දැනුවත්භාවය ඉහළ නැංවීම ද රජයේ ප්රමුඛතාවයක් බව ඔහු මෙහිදී සඳහන් කළේය.
