ශ්‍රී ලංකා මැණික් හා ස්වර්ණාභරණ සංගමයේ වාර්ෂික මහා සභා රැස්වීමේදී ප්‍රවීණ ස්වර්ණාභරණ නිෂ්පාදකයෙකු වන අක්‍රම් කාසිම් මහතා තෙවන වරටත් එහි සභාපතිවරයා ලෙස ඒකමතිකව තේරී පත්ව ඇති අතර, කර්මාන්තයේ ඉදිරි අභියෝග ජය ගැනීම සඳහා තරුණ හා අත්දැකීම් බහුල නියෝජිතයන්ගෙන් සමන්විත නව අධ්‍යක්ෂ මණ්ඩලයක් මෙහිදී පත් කරගනු ලැබීය. රටේ ආර්ථික සංවර්ධනයට සුවිශේෂී දායකත්වයක් ලබා දෙන මෙම කර්මාන්තය හමුවේ පවතින බදු, මූල්‍ය සහ නියාමන ගැටලු නිරාකරණය කරමින් ජාත්යන්තර මට්ටමේ තරඟකාරීත්වයක් ඇති කිරීම වත්මන් නායකත්වයේ ප්‍රධාන අරමුණ වී තිබේ.
නව මණ්ඩලය සමඟ සිය ඉදිරි දැක්ම එළිදක්වමින් සභාපතිවරයා පෙන්වා දුන්නේ, රළු මැණික් ආනයනය සම්බන්ධයෙන් දැනටමත් ළඟා කර ගෙන ඇති ප්‍රගතියට අමතරව රන් ආනයනය ලිහිල් කිරීම අගය එකතු කළ අපනයන සහ දේශීය ස්වර්ණාභරණ නිෂ්පාදනය නංවාලීමට ඉවහල් වන තීරණාත්මක පියවරක් බවයි. කර්මාන්ත අමාත්‍යාංශය, ජාතික මැණික් හා ස්වර්ණාභරණ අධිකාරිය (NGJA) මෙන්ම අපනයන සංවර්ධන මණ්ඩලය (EDB) ඇතුළු රාජ්‍ය බලධාරීන් සමඟ අඛණ්ඩව සම්බන්ධ වෙමින් ප්‍රතිපත්තිමය ප්‍රතිසංස්කරණ ක්‍රියාත්මක කිරීම කර්මාන්තයේ අනාගත පැවැත්මට අත්‍යවශ්‍ය වන බව ඔහු අවධාරණය කළේය.
ඉදිරි වසර සඳහා සැලසුම් කර ඇති ‘ෆැසට්ස් ශ්‍රී ලංකා 2027’ (FACETS Sri Lanka) ජාත්යන්තර ප්‍රදර්ශනය එහි 25 වන සංවත්සරය සහ 34 වන සංස්කරණය ලෙස වඩාත් සාර්ථකව ක්‍රියාත්මක කිරීමට නව කණ්ඩායම අපේක්ෂා කරන අතර, ගෝලීය ගැනුම්කරුවන් මෙරටට ආකර්ෂණය කර ගැනීම මෙහි විශේෂත්වයකි. ලෝක ප්‍රසිද්ධ ‘Gübelin Gem Lab’ ආයතනයද නිල හවුල්කරුවෙකු ලෙස සම්බන්ධ කර ගනිමින් දේශීය මැණික් හා ස්වර්ණාභරණ සංචාරක ව්‍යාපාරය සහ තරුණ ව්‍යවසායකයන්ගේ දායකත්වය පුළුල් කිරීමට ගෙන යන මෙම මෙහෙයුම හරහා ශ්‍රී ලංකාව ගෝලීය වෙළඳපොළ තුළ තවත් ශක්තිමත් කළ හැකි වනු ඇත.
