සමස්ත ලංකා බන්තු රේඛන ශිල්පීන්ගේ සංගමය මුහුණ දෙන දීර්ඝකාලීන වෘත්තීය ගැටළු සම්බන්ධයෙන් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් විශේෂ සාකච්ඡාවක් පසුගියදා සෞඛ්ය අමාත්යාංශයේදී පැවැත්විණි. රෝහල් පද්ධතිය තුළ බන්තු රේඛන ශිල්පීන් මුහුණ දෙන කාර්ය මණ්ඩල හිඟය, වැටුප් පරිමාණ ගැටළු, නිල නාමයන් සහ පුහුණු කටයුතු ඇතුළු කරුණු රැසක් කෙරෙහි මෙහිදී විශේෂ අවධානය යොමු විය.
සාකච්ඡාවේදී ගත් තීරණවලට අනුව, බන්තු රේඛන ශිල්පී පුහුණු පාසල වැඩිදියුණු කර මෙම වසර තුළදීම වැඩි ශිල්පීන් සංඛ්යාවක් පුහුණුව සඳහා බඳවා ගැනීමට පියවර ගැනේ. දැනට ලබන MT-4 වැටුප් පරිමාණය MT-6 දක්වා උසස් කිරීම සම්බන්ධයෙන් වැටුප් කොමිෂන් සභාව සමඟ සාකච්ඡා කර කඩිනම් පියවර ගැනීමට එකඟතාව පළ විය. තවද වෘත්තීය ගැටළු මඟහැරෙන පරිදි නිල නාමයන් පිළිබඳ තීරණ ගැනීමට නිල නාම කමිටුව වහාම රැස් කරන ලෙස අමාත්යවරයා උපදෙස් ලබා දුන්නේය.
ඊට අමතරව, බන්තු රේඛන ශිල්පීන් සඳහා යෝජිත උපාධි පාඨමාලාවේ ප්රගතිය සමාලෝචනය කර එම කටයුතු කඩිනම් කිරීමටත්, දිවයිනේ ප්රධාන රෝහල්වල හෘද රෝග ඒකකවල පැය 24 පුරා අඛණ්ඩව රෝගී සත්කාරක සේවා සැපයීම විධිමත් කිරීමටත් අවශ්ය උපදෙස් නිලධාරීන්ට ලබා දෙන ලදී.
රටේ සමස්ත හෘද රෝගී සත්කාරක සේවාවන් බිඳවැටීමකින් තොරව උසස් මට්ටමකින් පවත්වාගෙන යාම සෞඛ්ය අමාත්යාංශයේ ප්රමුඛතම අරමුණ බව පැවසූ අමාත්ය වෛද්ය නලින්ද ජයතිස්ස මහතා, බන්තු රේඛන ශිල්පීන්ගේ සාධාරණ ගැටළු විසඳීමට අමාත්යාංශය නිරන්තර අවධානය යොමු කරන බව සහතික විය. මෙම අවස්ථාවට අමාත්යාංශයේ අතිරේක ලේකම් චාමික එච්. ගමගේ, නියෝජ්ය අධ්යක්ෂ ජනරාල්වරුන්, පුහුණු අංශයේ අධ්යක්ෂ වෛද්ය සමන්ත ප්රභාත් රණසිංහ සහ සංගමයේ සභාපති කේ.එම් අනුරාධ ශාන්තකුමාර ඇතුළු පිරිසක් එක්ව සිටියහ.
