මුහම්මද් නබිතුමා ඇතුළු සියලු ආගමික ශාස්තෲන්වහන්සේගේ මඟපෙන්වීම වූ සාමය, මෛත්රිය සහ මනුෂ්යත්වය කැටි කරගත් සමාජයක් බිහි කිරීම වෙනුවෙන් වත්මන් රජය කැපවී සිටින බව ජනාධිපති අනුර කුමාර දිසානායක මහතා අවධාරණය කරයි.
මීගමුව අල්–හිලාල් මධ්ය මහා විද්යාලයීය ක්රීඩාංගණයේදී පැවති 42 වැනි ජාතික මිලාද්–උන් නබි රාජ්ය මහෝත්සවය අමතමින් ජනාධිපතිවරයා මේ බව කියා සිටියේය. බුද්ධශාසන, ආගමික හා සංස්කෘතික කටයුතු අමාත්යාංශය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව එක්ව මෙම උත්සවය සංවිධානය කර තිබිණි.
මෙහිදී වැඩිදුරටත් අදහස් දැක්වූ ජනාධිපතිවරයා පෙන්වා දුන්නේ දිගුකාලීන ජාතිවාදී ගැටුම්වල කුරිරු විනාශකාරී අත්දැකීම් රටට ඇති බවත්, එම අත්දැකීම් පාදක කරගනිමින් කවර ආකාරයක ජාතිවාදී හෝ ආගම්වාදී ගැටුමකට යළි රට තුළ ඉඩ නොතබන බවට සහතික වන බවත්ය. සිංහල, දෙමළ, මුස්ලිම් ඇතුළු සියලු ජනතාවගේ සමානාත්මතාව මත පිහිටා ජාතික සමගිය ගොඩනැඟීම රට සංවර්ධනය කිරීමේ මූලික අත්තිවාරම වන බව ඔහු සඳහන් කළේය.
මෙම අවස්ථාවට බුද්ධශාසන, ආගමික සහ සංස්කෘතික කටයුතු ඇමැති ආචාර්ය හිනිදුම සුනිල් සෙනෙවි, නියෝජ්ය අමාත්යවරුන්, ආගමික නායකයන්, විදේශ තානාපතිවරුන් සහ මහජනතාව විශාල පිරිසක් එක්ව සිටියහ.
