යුද ගැටුම්වලින් පීඩිත ගාසා තීරයේ ජනතාව වෙත අත්යවශ්ය මානුෂීය සහන ද්රව්ය රැගෙන යාත්රා කරමින් තිබූ ජාත්යන්තර සහන බෝට්ටු බලඇණියක (Aid Flotilla) යාත්රා 10ක් ඊශ්රායල නාවික හමුදාව විසින් මධ්යධරණී මුහුදේදී වටලා තම භාරයට ගෙන ඇති බවත්, එහි තිබූ තවත් යාත්රා 23ක් සමඟ පැවති සන්නිවේදන සබඳතා මුළුමනින්ම ඇණහිට ඇති බවත් එම සහන මෙහෙයුමේ සංවිධායකයෝ අද (18) නිල වශයෙන් ප්රකාශ කළහ.
“ග්ලෝබල් සුමුද් ෆ්ලෝටිලා” (Global Sumud Flotilla) ලෙස නම් කර ඇති මෙම සහන යාත්රා බලඇණිය, ඊශ්රායලයේ දැඩි මුහුදු අවහිරතා මධ්යයේ ගාසා තීරයට සහන සැලසීම සඳහා පසුගිය බ්රහස්පතින්දා දකුණු තුර්කියේ වරායකින් සිය තෙවන මෙහෙයුම ආරම්භ කර තිබුණි. කෙසේ වෙතත්, අද දින ඊශ්රායල විදේශ අමාත්යාංශය “X” (ට්විටර්) සමාජ මාධ්ය ජාලය ඔස්සේ විශේෂ නිවේදනයක් නිකුත් කරමින් අවධාරණය කර සිටියේ, ගාසා තීරය වටා පනවා ඇති නීත්යානුකූල නාවික අවහිරතා (Naval Blockade) උල්ලංඝනය කිරීමට කිසිදු පාර්ශ්වයකට ඉඩ නොදෙන බවයි.
සහන සංවිධාන නිකුත් කළ සෘජු වීඩියෝ දර්ශන (Live Video) මඟින් ඊශ්රායල සන්නද්ධ මිලිටරි යාත්රා මෙම සහන බෝට්ටු වෙත ළඟා වන ආකාරය දැක්වුණු අතර, පූර්ණ දහවල් ආලෝකය මධ්යයේ ඊශ්රායල සේනාංක තම ප්රමුඛ පෙළේ බෝට්ටුවලට බලහත්කාරයෙන් ඇතුළු වූ බව සංවිධායකයෝ පවසති. ගාසා වෙරළ තීරයේ සිට නාවික සැතපුම් 250ක් (කිලෝමීටර් 463ක්) පමණ දුරින් මුහුදේදී මෙම වැටලීම සිදුව ඇති අතර, එහිදී තුර්කි ජාතිකයන් ඇතුළු රටවල් 39ක් නියෝජනය කරමින් මානුෂීය ක්රියාකාරීන් 426 දෙනෙකු මෙම යාත්රා 54කින් යුත් බලඇණිය සමඟ එක්ව සිට ඇත. තුර්කිය ඇතුළු ජාත්යන්තර සහන සංවිධාන පෙන්වා දෙන්නේ ගාසා තීරයට දැනට ලැබෙන ද්රව්ය ප්රමාණවත් නොවන බව වුවත්, ඊශ්රායලය පවසන්නේ තමන් මානුෂීය ආධාර ගලා ඒම වළක්වා නොමැති බවයි.
