බංග්ලාදේශයට බලපා ඇති අධික මෝසම් වැසි, හදිසි ගංවතුර සහ නායයෑම් හේතුවෙන් පසුගිය සතිය තුළ පුද්ගලයින් 50 දෙනෙකු ජීවිතක්ෂයට පත්ව ඇති බව එරට නිලධාරීන් අද (12) තහවුරු කළේය.
අධික ගංවතුර තත්ත්වය හේතුවෙන් දහස් ගණනක් ජනතාව තම නිවෙස්වලින් අවතැන් වී ඇති අතර, විශාල පිරිසක් ආහාර සහ පානීය ජලය නොමැතිව දැඩි දුෂ්කරතාවයට පත්ව සිටිති. විශේෂයෙන්ම බංග්ලාදේශයේ ගිනිකොනදිග චිතගොං (Chattogram) දිස්ත්රික්කයට මෙම තත්ත්වය දැඩි ලෙස බලපා ඇති අතර, නායයෑම් නිසා පමණක් 29 දෙනෙකු ජීවිතක්ෂයට පත්ව ඇත. තවත් පුද්ගලයින් දෙදෙනෙකු අතුරුදහන්ව සිටින බව බලධාරීන් පවසයි.
අවතැන් වූවන් සඳහා රජය මගින් පවත්වාගෙන යනු ලබන මධ්යස්ථාන 4,000කට වැඩි ප්රමාණයක 35,000කට අධික පිරිසක් මේ වන විට රැකවරණය ලබා සිටිති. හමුදා සහ දේශසීමා ආරක්ෂක භටයින් විසින් ගංවතුරින් යටවූ ප්රදේශවල ජනතාවට බෝට්ටු මගින් ආහාර සහ අත්යවශ්ය ද්රව්ය බෙදා හැරීමේ කටයුතු සිදු කරමින් පවතී.
කොක්ස් බසාර් හි පිහිටි රෝහින්ග්යා සරණාගත කඳවුරුවලටද පසුගිය සතියේ ඇදහැළුණු අධික වර්ෂාව හේතුවෙන් නායයෑම් සිදුවූ අතර, එම සිදුවීම්වලින් පුද්ගලයින් 15 දෙනෙකු මිය ගියේය.
ගංවතුර තත්ත්වය ගිනිකොනදිග දිස්ත්රික්කවල මඳක් සමනය වුවත්, බංග්ලාදේශයේ ඊසානදිග සහ උතුරු ප්රදේශවලට තවදුරටත් මෝසම් වැසි බලපාන බැවින් එම ප්රදේශවල තවදුරටත් ජලගැලීම් ඇති විය හැකි බව ගංවතුර අනතුරු ඇඟවීමේ මධ්යස්ථානය පෙන්වා දෙයි. දේශගුණික විපර්යාස හේතුවෙන් මෙවැනි ආන්තික කාලගුණික තත්ත්වයන්ගේ තීව්රතාවය සහ සංඛ්යාතය වැඩිවෙමින් පවතින බව විද්යාඥයින් පවසති.
