ශ්රී ලංකාව මේ වන විට මහා විනාශයක් කරා ගමන් කරන බවත්, වත්මන් රජය බලයට පත් කළ ජනතාව අද වන විට හාමතේ පසුවන බවත් ජනසෙත පෙරමුණේ නායක පූජ්ය බත්තරමුල්ලේ සීලරතන හිමියන් පවසති. වත්මන් දේශපාලන තත්ත්වය සිනමාපට ද්විත්වයකට උපමා කරමින් උන්වහන්සේ කියා සිටියේ ජනතාව බලාපොරොත්තු වූ පාලනයක් රට තුළ ක්රියාත්මක නොවන බවයි. ජාතික ජන බලවේගය බලයට පත් වූ දා සිට ගම්මානවල අහිංසක දුප්පත් ජනතාවට කිසිදු සහනයක් ලැබී නොමැති බවට චෝදනා කරන සීලරතන හිමියෝ, අඛණ්ඩව ඉන්ධන මිල ඉහළ දැමීම හරහා වත්මන් රජය ජනතාවට දඬුවම් දෙමින් සිටින බව පෙන්වා දෙති. මෙම මිල ඉහළ යාම හමුවේ සාමාන්ය ජනතාවට තේ එකක් බීමට, රොටියක් හෝ බත් වේලක් අනුභව කිරීමට පවා නොහැකි වී ඇති බවත්, ව්යසන සහ ගංවතුර තත්ත්වයන්ගෙන් පීඩාවට පත් ජනතාවට සහල් ලබා දීමට හෝ වෙනත් සහනයක් ලබා දීමට රජය අපොහොසත් වී ඇති බවත් උන්වහන්සේ වැඩිදුරටත් සඳහන් කළහ.
එමෙන්ම, සමාජ මාධ්ය ජාල තුළ සම්බුද්ධ ශාසනයට එරෙහිව කටයුතු කරන විකෘති කණ්ඩායම් සිටින බව පෙන්වා දුන් සීලරතන හිමියන්, බුද්ධ ශාසනය ආරක්ෂා කර ගැනීම සඳහා මහා සංඝරත්නය පෙරමුණ ගත යුතු බව අවධාරණය කළහ. දායකයන් ගෙනත් දෙන දානය වළඳා පමණක් සිටියහොත් බුද්ධ ශාසනය විනාශ වන බව පවසන උන්වහන්සේ, ශාසනය රැකගැනීම සඳහා මහා සංඝරත්නය එක්ව පාරට බැස මෙම විනාශය නතර කිරීමට වැඩ කළ යුතු බව පැවසූහ. රට සහ බුද්ධ ශාසනය ආරක්ෂා කළ හැකි එකම දේශපාලන පක්ෂය ‘ජනසෙත පෙරමුණ’ පමණක් බව පවසන සීලරතන හිමියන්, රටේ පවතින දේශපාලන හා සමාජීය කුණු අතුගා දැමීම සඳහා තම පක්ෂයේ ‘ට්රැක්ටරය’ ලකුණට බලය ලබා දෙන ලෙස ජනතාවගෙන් ඉල්ලා සිටිති.
