කොළඹ නාගරික ප්රදේශවල අඩු ආදායම්ලාභී ජනතාව පදිංචිව සිටින මහල් නිවාස සංකීර්ණවල ජන ජීවිතය උසස් කිරීම සඳහා රජය විසින් විශේෂ ප්රතිසංස්කරණ වැඩපිළිවෙළක් ආරම්භ කර තිබෙනවා. ප්රවාහන, මහාමාර්ග සහ නාගරික සංවර්ධන අමාත්යාංශයේ මෙහෙයවීමෙන්, නාගරික සංවර්ධන අධිකාරිය (UDA) මඟින් ක්රියාත්මක කරනු ලබන මෙම ‘Metro Uplift’ ව්යාපෘතිය යටතේ මේ වසර තුළ පමණක් රුපියල් මිලියන 1,500ක මුදලක් වෙන් කර ඇති බවයි වාර්තා වන්නේ. මෙම නවීකරණ කටයුතුවල වත්මන් තත්ත්වය සොයා බැලීම සඳහා ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක මහතා පසුගිය 20 වැනිදා කොළඹ 09, දෙමටගොඩ ප්රදේශයේ පිහිටි ‘මිහිඳු සෙන්පුර’ සහ ‘සියපත් සෙවණ’ නිවාස සංකීර්ණවල විශේෂ ක්ෂේත්ර නිරීක්ෂණයක නිරත විය.
මෙහිදී ගිනි නිවන පද්ධති, ගිලා බැස ඇති පදික වේදිකා, මෑන් හෝල්, ජලාපවහන හා කානු පද්ධති, පොදු ප්රදේශවල විදුලි ආලෝකය, කසළ බැහැර කිරීමේ ක්රමවේද, මායිම් තාප්ප, ආරක්ෂිත කැමරා පද්ධති (CCTV) සහ පොලිස් මුරපොළ ඇතුළු පදිංචිකරුවන්ට අත්යවශ්ය පහසුකම් රැසක් නවීකරණය කිරීම සම්බන්ධයෙන් අමාත්යවරයා නිලධාරීන් සමඟ සාකච්ඡා කළේය. 2013 වසරේ ඉදිකරන ලද, පර්යන්ත 6කින් සහ නිවාස ඒකක 820කින් සමන්විත දෙමටගොඩ ‘මිහිඳු සෙන්පුර’ නිවාස සංකීර්ණයේ නවීකරණ කටයුතු සඳහා රුපියල් ලක්ෂ 249ක් වැය කෙරෙන අතර, 2018 වසරේ ජනතා අයිතියට පත්කළ පර්යන්ත 3කින් හා නිවාස ඒකක 702කින් සමන්විත ‘සියපත් සෙවණ’ නිවාස සංකීර්ණය සඳහා රුපියල් ලක්ෂ 66.8ක් වැය කිරීමට නියමිතය. මීට අමතරව මෙම මහල් නිවාස දෙකෙහිම මලාපවහන පද්ධති සම්පූර්ණයෙන්ම අලුත්වැඩියා කිරීම වෙනුවෙන් රුපියල් ලක්ෂ 203ක විශේෂ මුදලක් වෙන් කර තිබේ.
මෙහිදී අදහස් දැක්වූ අමාත්ය බිමල් රත්නායක මහතා පෙන්වා දුන්නේ කොළඹ මෙවැනි අඩු ආදායම්ලාභී මහල් නිවාස පද්ධති 27ක් පවතින බවත්, මූලික සැලසුම්වල අඩුපාඩු හා දීර්ඝ කාලයකින් නිසි නඩත්තුවක් සිදු නොවීම නිසා ජනතාව දැඩි පීඩාවකට පත්ව ඇති බවත්ය. නාගරික සංවර්ධනයේ මූලධර්ම සුරකිමින් මිනිසුන්ට හිතකර ජීවන පරිසරයක් නිර්මාණය කිරීම රජයේ වගකීමක් බව පැවසූ අමාත්යවරයා, රජය විශාල මුදලක් වැය කර ගොඩනඟන මෙම පොදු පහසුකම් ආරක්ෂා කර ගැනීමට නිවැසියන් ද කමිටුගත වී සක්රියව මැදිහත් විය යුතු බව වැඩිදුරටත් අවධාරණය කළේය.
