කැලණිය විශ්වවිද්යාලයේ වාණිජ හා කළමනාකරණ අධ්යයන පීඨයට අනුබද්ධ මූල්ය අධ්යයනාංශය ස්ථාපිත කර වසර 15ක් පිරීම නිමිත්තෙන් විශේෂ සැමරුම් වැඩසටහන් මාලාවක ආරම්භක අවස්ථාව හෙට, එනම් ජුනි 24 වැනිදා පැවැත්වීමට සියලු කටයුතු සූදානම් කර තිබෙනවා. මෙරට ප්රාග්ධන වෙළෙඳපොළ සහ මූල්ය ක්ෂේත්රයේ ප්රගමනය උදෙසා මෙම අධ්යයනාංශයෙන් ඉටු වූ සුවිශේෂී මෙහෙවර පිළිඹිබු කරමින් හෙට දිනයේ කොළඹ කොටස් හුවමාරුවේදී (CSE) සංකේතාත්මකව සීනු නාද කිරීමේ (Bell Ringing Ceremony) විශේෂ උත්සවයක් පැවැත්වීම මෙහි සුවිශේෂී අවස්ථාවක් වනවා.
මෙම සංවත්සර සැමරුම් කටයුතු ආශීර්වාද පිරිත් දේශනාවකින් සහ දානමය පින්කමකින් ආරම්භ වන අතර අධ්යයනාංශයේ ඓතිහාසික ගමන් මඟ, ආචාර්ය මණ්ඩලය සහ ආදි විද්යාර්ථීන්ගේ මතකයන් අනුස්මරණය කෙරෙන 15 වන සංවත්සර අනුස්මරණ ග්රන්ථය (15th Anniversary Commemorative Booklet) ද මෙහිදී එළිදැක්වීමට නියමිතයි. මීට අමතරව අධ්යයනාංශයේ ආරම්භක සාමාජිකයන්, විද්වතුන් සහ ක්ෂේත්රයේ ප්රවීණයන්ගේ සහභාගිත්වයෙන් සකස් කළ “15 Years of Finance” විශේෂ වීඩියෝව ඩිජිටල් මාධ්ය ඔස්සේ මුදාහැරීමටත්, දැනුම බෙදාහැරීමේ කාර්යය තවදුරටත් පුළුල් කරමින් අධ්යයනාංශයේ නිල යූ ටියුබ් (YouTube) නාළිකාව ජනගත කිරීමටත් සැලසුම් කර තිබේ.
අධ්යයනාංශයේ උන්නතිය වෙනුවෙන් කැපවූ සියලුම පාර්ශ්වකරුවන් ඇගයීමට ලක් කරමින් එළඹෙන ජුනි 30 වැනි දින ආදි විද්යාර්ථීන්ගේ සහ වෘත්තීය ක්ෂේත්රයේ හවුල්කරුවන්ගේ සහභාගිත්වයෙන් සුහද හමුවක් හා උපහාර රාත්රී භෝජන සංග්රහයක් ද උත්කර්ෂවත් අන්දමින් පැවැත්වීමට සංවිධායක මණ්ඩලය කටයුතු යොදා ඇත.
