ශ්‍රී ලංකාවේ දුම්රිය මාර්ග පද්ධතිය නවීකරණය කිරීමේ පියවරක් ලෙස, අධික මගී ඝනත්වයක් සහිත ප්‍රධාන දුම්රිය මාර්ග කොරිඩෝ කිහිපයක් විද්‍යුත්කරණය කිරීමට අමාත්‍ය මණ්ඩලයේ අනුමැතිය හිමිවී තිබේ. ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක මහතා විසින් මෙම යෝජනාව ඉදිරිපත් කරන ලදී.
මෙම ව්‍යාපෘතියේ ප්‍රධාන අරමුණ වන්නේ වර්තමානයේ ඩීසල් බලයෙන් ක්‍රියාත්මක වන මෙහෙයුම් වෙනුවට තිරසර සහ පරිසර හිතකාමී ප්‍රවාහන පද්ධතියක් ස්ථාපිත කිරීමයි.
ව්‍යාපෘතිය යටතේ සිදුකෙරෙන සංවර්ධන කටයුතු:
මරදාන සිට රාගම දක්වා දුම්රිය මාර්ග කොටස විද්‍යුත්කරණය කෙරේ. ඊට සමගාමීව ගම්පහ, වේයන්ගොඩ, මීරිගම සහ පොල්ගහවෙල දුම්රිය ස්ථානවල ගොඩනැඟිලි නවීකරණය කිරීමට නියමිතය.
කැලණිවැලි මාර්ගයේ මරදාන සිට මාකුඹුර දක්වා කොටස සහ මුහුදුබඩ මාර්ගයේ මරදාන සිට පානදුර දක්වා කොටස ද මෙම නවීකරණ වැඩසටහනට ඇතුළත් වේ.
මෙම වැඩපිළිවෙළ මගින් දුම්රිය ගමන් කාලය අඩු කිරීම, මගී ප්‍රවාහන ධාරිතාව ඉහළ නැංවීම සහ සේවා විශ්වසනීයත්වය වැඩිදියුණු කිරීම අපේක්ෂා කෙරේ.
ජාත්‍යන්තර සංවර්ධන ආයතනවල සහාය ඇතිව ක්‍රියාත්මක කෙරෙන මෙම දිගුකාලීන ව්‍යාපෘතිය හරහා නව දුම්රිය මාර්ග ඉදිකිරීම, ද්විත්ව මාර්ග ඇති කිරීම සහ සංඥා පද්ධති නවීකරණය කිරීම වැනි පුළුල් සංවර්ධන කටයුතු රැසක් දුම්රිය ක්ෂේත්‍රය තුළ සිදු වනු ඇත.
